Футбол бўйича Европа Лигасининг 1/8 финалига ўтиш ўйинида “Барселона” ва “Манчестер Юнайтед” жамоалари 16 февраль, пайшанба куни “Камп Ноу”да ўзаро тўқнаш келади.
Каталонияликлар Чемпионлар Лигасининг C гуруҳида 3-ўринни эгаллаб, Европа Лигасига тушиб кетган эди. “Қизил иблислар” эса ушбу мусобақанинг E гуруҳида 2-ўринни банд этганди. Қуръага кўра жамоалар бир-бирига қарши баҳс олиб борадиган бўлди.
Улар Европа Лигасида илк бор тўқнаш келмоқда
Европа Лигасининг плей-офф босқичи қуръаси жуда катта қизиқишларга сабаб бўлди. “Манчестер Юнайтед”, “Барселона”, “Ювентус” ва “Аякс” каби катта жамоалар ҳам ушбу мусобақада иштирок этмоқда. “Манчестер Юнайтед” ва “Барселона” жуфтлиги эса сифатли Еврокубоклар ҳафталигини яна бир кунга узайтирди.
Менимча, “Барселона” ҳам биз каби бу ўйинни финалда бўлишини афзал кўрган бўларди, — дейди манкунианлар бош мураббийи Эрик тен Ҳаг.
“Манчестер Юнайтед” нидерландиялик мутахассис қўл остида Алекс Фергюсон давридан буён бўлмаган барқарор очко жамғаришни ўрганди. АПЛ жадвалида “қизил иблислар” 3-ўринга мустаҳкам жойлашган, мавсум аввалидаги иккита мағлубиятдан ва ишончсиз ўйиндан сўнг бунга ишониш қийин эди. “Манчестер Юнайтед” — жорий мавсум 4 та мусобақада ҳам иштирокини давом эттираётган ягона клуб. Тен Ҳаг шубҳасиз тўғри йўлда.
Уларга қарши ўйин қийин кечади, — деди “Барселона” бош мураббийи Хави рақиб ҳақида.
Ўз навбатида “Барселона” Испания чемпионатида етакчилик қилмоқда. “Реал” билан орадаги фарқ 8 очко. Каталонияликлар барча мусобақаларда кетма-кет 11 та ғалабани қўлга киритди. “Кўк-анорранглилар” сўнгги бор 2022 йил октябрь ойида ЕЧЛ доирасида “Бавария”га мағлуб бўлганди. Хави “Барселона”да сифатли ишни амалга оширмоқда.
“Барселона” ва “Манчестер Юнайтед”нинг йўллари Чемпионлар Лигасида тез-тез кесишиб туради. Икки марта гуруҳ босқичида (1994/95, 1998/99 йилги мавсумлар) ўзаро тўқнаш келган. Плей-офф босқичи эса (2007/08 ва 2018/19 йилги мавсумлар) ҳали хотиралардан ўчмади. Пеп Гвардиола Алекс Фергюсондан бир бош устунлигини исботлаган финаллар эса (2008/09 ва 2010/11) тарихга муҳрланган.
“Манчестер Юнайтед” Каталония пойтахтига меҳмон бўлган ўйинларни ёдга оламиз.
ЕЧЛ 1994/95 йилги мавсум. Гуруҳ босқичи. 4-тур. “Барселона” 4:0 “Манчестер Юнайтед”
Ўша вақтларда Чемпионлар Лигасининг гуруҳ босқичида 16 та жамоа иштирок этган. Барча иштирокчилар — ўз мамлакатларининг чемпионлари. “Юнайтед” “Барселона”, “Гётеборг” ва “Галатасарой” билан бир гуруҳга тушди.
Сер Алекс шогирдлари гуруҳ босқичини “Гётеборг” устидан 4:2 ҳисобидаги ғалаба билан бошлади. Истамбулдаги 0:0 ҳисобида дурангдан сўнг 3-турда “Барселона”ни қабул қилиши керак эди. “Олд Траффорд”да ўтган ўйин дуранг (2:2) билан якунланган.
Орадан 2 ҳафта ўтиб, манкунианликлар “Камп Ноу”да меҳмон бўлган. “Барселона”ни фақатгина ғалаба қониқтирар эди. Бошқа ҳар қандай натижа Йоҳан Кройфф жамоасининг плей-оффга чиқиш вазифасини мураккаблаштирарди.
Меҳмонлар сафида ҳамон Эрик Кантона йўқ эди. Француз бир йил аввал Чемпионлар Лигасининг “Галатасарой”га қарши жавоб ўйинида полиция билан содир бўлган тўқнашув учун дисквалификация қилинган эди.
Мезбонларда эса илк дақиқаларданоқ бош мураббийнинг ўғли Йорди Кройфф майдонда кўриниш берди. 20 ёшли футболчи 60 дақиқа ҳаракат қилди. Унинг фаол ҳаракатлари эвазига “Барселона” рақиб дарвозасига жавобсиз 4 та гол урган.
Испаниядаги йирик мағлубиятдан сўнг “Манчестер Юнайтед”нинг Швецияга сафари ҳам омадсиз кечди. Жамоа “Гётеборг”га 1:3 ҳисобида имкониятни бой берди. Натижада манкунианликлар гуруҳда 3-ўринни эгаллади. Кетма-кет иккинчи йил “Манчестер Юнайтед”нинг Еврокубоклардаги юриши кўнгилдагидек ўтмади.
ЕЧЛ 1998/99 йилги мавсум. Гуруҳ босқичи. 5-тур. “Барселона” 3:3 “Манчестер Юнайтед”
Ўша мавсумда гуруҳ босқичида 24 та жамоа иштирок этган. Ғолиблар тўғридан тўғри плей-оффга йўл оларди. Иккинчи ўринни эгаллаган энг яхши икки жамоа эса кейинги босқич йўлланмаси учун кураш олиб борган. “Манчестер Юнайтед”, “Бавария”, “Барселона” ва “Брондбю” — норасмий равишда номланган “ўлим гуруҳи”.
“Олд Траффорд”да ўтган дастлабки турдаёқ жамоалар 3:3 ҳисобини қайд этди. “Манчестер Юнайтед” гуруҳ босқичида жуда кўп гол урарди, шу билан бирга ўз дарвозасидан жуда кўп тўп олиб чиқарди. Луи ван Гал қўл остидаги “Барселона” эса барқарор ўйин намойиш этмасди. Испанияликлар иккита ўйиндаям “Бавария”га мағлуб бўлиб, ўз вазифасини қийинлаштирган. “Камп Ноу”да эса уларга фақатгина ғалаба керак эди.
Натижа: биринчи турдаги ҳисоб яна бир бор қайд этилиб, каталонлар мусобақадан чиқиб кетган. Таркибида 2 нафар “Олтин тўп” соҳиби бўлган клубга 100 ёшини ўз майдонида ғалаба билан нишонлаш насиб этмаган.
“Манчестер Юнайтед” ўша мавсумда яна бир бор Барселонага ташриф буюрган ва финалда “Бавария” устидан тарихий ғалабани қўлга киритган.
Бу энг катта муваффақият деб ўйлайман. Гуруҳ босқичида “Бавария” ва “Барселона” каби жамоалар билан тўқнашдик, йўлимизда давом эта олдик. Қўл остимда “Манчестер Юнайтед” илк бор Чемпионлар Лигасини соҳибига айланди ва бу ҳаётимиздаги энг муҳим ўйин эди, — деган эди 1999 йилги финалдан кейин Алекс Фергюсон.
ЕЧЛ 2007/08 йилги мавсум. Плей-офф. Ярим финал. “Барселона” 0:0 “Манчестер Юнайтед”
15 йил олдин Криштиану Роналду ва Лионель Месси илк бор майдонда тўқнаш келган. Португалиялик “Манчестер Юнайтед” сафида ақл бовар қилмас мавсумини ўтказган, барча мусобақаларда 40 дан ортиқ гол урганди. Аргентиналик эса эндигина ўз йўлини бошлаётган эди. 20 ёшли вундеркинднинг “гол+пас” тизимида 30 очко жамғариши ғайриоддий футболчи ўсиб келаётганининг исботи эди.
Манкунианлар Премьер Лигада кетма-кет иккинчи ғалабасини нишонлашга тайёргарлик кўраётганди. Франк Райкард бошчилигидаги “Барселона” эса Испания чемпионатида 4 ўйиндан буён ғалаба нималигини билмаётган эди.
Ўйиннинг 2-дақиқасидаёқ 11 метрлик жарима зарбаси белгиланди. Бироқ “Манчестер Юнайтед”нинг 7-рақамли футболчиси ҳисобни очолмади. Учрашув якунида қайд этилган 0:0 ҳисоби иккала жамоа учун ҳам яхши имкониятни қолдирди.
“Олд Траффорд”да ўтган жавоб ўйинида Пол Скоулз томонидан урилган ажойиб гол қарама-қаршилик тақдирини ҳал қилди. “Манчестер Юнайтед” финалга йўл олди ва ўз тарихидаги учинчи ЕЧЛ кубогига эга чиқди.
“Олд Траффорд”даги мағлубиятдан 10 кун ўтиб, Хоан Лапорта кейинги мавсумдан Райкард ўрнини Пеп Гвардиола эгаллашини эълон қилганди.
ЕЧЛ 2018/19 йилги мавсум. Плей-офф. 1/4 финал. “Барселона” 3:0 “Манчестер Юнайтед”
Инглиз клубининг каталонияликлар пойтахтига сўнгги ташрифи мухлислар ёдида узоқ сақланиб қолиши гумон. “Парк де Пренс”даги француз эртаги Испанияда давом эттирилмади.
Сульшер “Манчестер Юнайтед” бош мураббийлигига келгач, кетма-кет 11 ўйинлик мағлубиятсиз серия намойиш этиб, жамоанинг руҳиятини кўтарган эди. “ПСЖ” устидан қозонилган ғалабадан сўнг раҳбарият норвегиялик мутахассисни доимий мураббийликка тасдиқлади. Қизиғи, шартнома имзолангандан сўнг жамоанинг натижалари кескин равишда пасайиб кетди.
“Манчестер Юнайтед” уй учрашувида мағлубиятга учради. Жавоб ўйинида эса Лионель Месси дастлабки 20 дақиқа ичида дублни расмийлаштирди. Иккинчи бўлимда Коутиньо томонидан урилган гол эса якуний ҳисобни ўрнатди.
Манкунианлар “Барселона”ни “Камп Ноу”да ҳеч қачон мағлуб эта олмаган. 1999 йилги Чемпионлар Лигаси финалида “Бавария” устидан қозонилган ғалаба “қизил иблислар” учун Барселона бош аренасидаги ягона ютуқлигича қолмоқда. Эрик тен Ҳаг тарихга кириши учун яна бир имконият.
Изоҳ (0)