“Вест Ҳэм” футболчиси Деклан Райснинг “Арсенал”га ўтиши ушбу ёздаги энг қиммат трансфер бўлиб турибди. “Болғачилар” 24 ёшли футболчи учун 116 миллион евро ва бонуслар олади.
Райс — “канонирлар” тарихидаги энг қиммат трансфер. Англиялик футболчига қадар 4 йил олдин “Лилль”дан 80 миллион эвазига харид қилинган Николя Пепе “Арсенал”нинг энг қиммат трансфери эди.
Шунингдек, Деклан футбол тарихидаги энг қиммат футболчилар топ-10 лигидан ҳам жой олди. Қуйида энг қиммат 10 футболчи ҳақида сўз боради.
Қолган футболчиларда нима гап?
• Неймар 6 йил аввал “Барселона”дан “ПСЖ” сафига ўтганди. Месси соясидан кетиб, бошқа бир жамоада порлаб, “Олтин тўп”ни қўлга киритиш истагида бўлган бразилиялик футболчи ҳамон ушбу совринни қўлга кирита олмади. Парижликларнинг янги мураббийи Луис Энрике ҳозирча футболчига ишонч билдирмоқда, бироқ ундан қатъий интизом талаб қилинади. Неймар буни уддалай олармикан?
• Килиан Мбаппе нафақат “ПСЖ”нинг асосий юлдузи, балки, бошоғриғига ҳам айланиб бўлди. Шартномани узайтирмаслиги борасидаги хабаридан сўнг парижликлар унга турли хил таҳдидларни қўлламоқда. Париж клуби “Реал” асосий даъвогар бўлиб турган футболчидан шартномани узайтиришни талаб қилмоқда. “ПСЖ” Мбаппени текинга қўйиб юборишни истамаяпти.
• Филиппе Коутиньо — “Барселона” тарихидаги энг омадсиз трансферлардан бири. Бразилиялик футболчи клубда Андрес Иньестанинг ўрнини эгаллаши лозим эди, бироқ на Вальверде, на Куман уни жамоа ўйин тизимига мослаштира олмаган. “Бавария”га ижарага ўтиш ҳам Коутиньога ёрдам бермаган. Ҳозирда “Астон Вилла” футболчиси бўлиб турган Филиппенинг ҳамон ишлари ўхшамаяпти.
• Усмон Дембеленинг ҳам каталонияликлар сафидаги фаолияти жуда оғир бошланган. Доимий жароҳатлардан сўнг Хави унинг фаолиятига қайта жон бағишлади. Ҳозир у клубнинг энг асосий футболчиларидан бири, ҳаттоки, янги мавсум сардорлари рўйхатидан ҳам жой олган. “Кўк-анорранглилар” футболчи билан шартномани 2027 йилгача узайтириш борасида музокаралар олиб бормоқда.
• “Атлетико” Жоау Феликс борасида адашган кўринади. Португалиялик Гризманнга ўринбосар сифатида олиб келинганди, бироқ у “матрасчилар”нинг асосий таркибидан жой ололмади. “Челси”даги фаолияти ҳам унга ёрдам бера олмади. Жоау “Атлетико”дан кетишни истамоқда. Яқиндагина “Барселона”га ўтиш орзуси борлиги ҳақида интервью ҳам берди. Лекин ҳозирча футболчига фақатгина “Астон Вилла”дан қизиқиш мавжуд.
• Энцо — Тодд Боулининг оммавий харидлари рамзидир. Аргентиналикнинг “аристократлар”даги старти ёмон кечмади. Почеттино қўл остида эса янада кўпроқ қобилиятини намойиш этишга имкон бўлади. Бунинг учун Энцода вақт кўп бўлади: унинг лондонликлар билан шартномаси 2032 йилгача мўлжалланган.
• Антуан Гризманн “Барселона”да ўйнаб кета олмади ва “Атлетико”га қайтди. Мадридликлар сафида яна ўзининг юқори даражадаги ўйинларини намойиш этмоқда. Ҳатто, аввалги 7-рақамини ҳам қайтариб олди.
• Энг қиммат инглиз футболчиси Жек Грилиш ҳамон тахтда. “Манчестер Сити” “Астон Вилла”га тўлаб берган нархни ҳозирча ҳеч қайси клуб янгилай олгани йўқ. Дастлаб, Жек Пеп тизимига киришиб кета олмайди деб ҳисобланганди, лекин ортда қолган мавсум бу гап-сўзларга чек қўйди.
• Криштиану Роналдунинг трансфери “Ювентус”ни иқтисодий инқирозга олиб келди. Португалиялик футболчи майдонда мунтазам гол уриб турган бўлса-да, туринликларнинг энг катта мақсади бўлган Чемпионлар Лигасида зафар қучишга ёрдам бера олмаган.
Изоҳ (0)