Суперлиганинг 14-туридан ўрин олган баҳсда “Навбаҳор” клуби ўз майдонида Муборакнинг “Машъал” жамоасини қабул қилди. Мазкур ўйинда наманганликлар рақибга ҳеч қандай имконият қолдирмади ва йирик – 6:0 ҳисобида ғалаба қозонди.
Мезбонлар ушбу учрашув тақдирини ўйиннинг 1-бўлимида Алишер Одилов, Русланбек Жиянов, Забиҳилло Ўринбоев ва Аббос Ғуломовнинг голлари эвазига деярли ҳал қилиб қўйганди.
Сергей Лушан шогирдлари 2-бўлимда ҳам ҳужумни сусайтирмади. Натижада Аббос Ғуломов яна бир гол уриб, ушбу ўйинда дублга эришган бўлса, захирадан майдонга тушган бразилиялик ҳужумчи Аугусто Педро учрашув якунланишига саноқли дақиқалар қолганида рақиб дарвозасига тўп киритиб, якуний ҳисобнинг 6:0 кўриниш олишини таъминлади.
Қайд этилишича, “Навбаҳор” олис 1995 йили муборакликларни 8:0 ҳисобида мағлуб этган. Наманганликларнинг мазкур ўйинда эришган натижаси яна бир шундай йирик ҳисобнинг такрорланиши бўлди.
Ушбу ғалабадан сўнг “Навбаҳор” очколари сонини 26 тага етказган ҳолда турнир жадвалида 3-ўринга кўтарилди.
“Дарё” “Навбаҳор” ва “Машъал” ўртасидаги ўйиндан фотогалерея тайёрлади.
Фотолар муаллифи: Оқилхон Мамажонов
Изоҳ (0)