Ижтимоий тармоқларда Жиззахда 8 нафар қиз “эр керак” ёзуви туширилган плакатни кўтариб юрган видеоси тарқалди. Ҳолат юзасидан вилоят Оила ва хотин-қизлар бошқармаси маълумот берди.
Маълум қилинишича, мазкур ҳолат юзасидан вилоят ҳокими ўринбосари — Оила ва хотин-қизлар бошқармаси бошлиғи бориб ҳолатни ўрганди. Жиззах шаҳар ҳудудидаги деҳқон бозори рўпарасида 8 нафар қиз салонда оқ келинлик кўйлагини кийиб олган ҳолда қўлларига “Эр керак” деб ёзилган плакатларни ушлаб, кўчада юрган.
Тасвирлар салонни реклама қилиш мақсадида салон раҳбари ҳамда ижтимоий тармоқ фойдаланувчиси (блогер) Ш.Э.лар томонидан ташкил этилгани, улар реклама видеоролиги тайёрламоқчи бўлгани аниқланди.
Ҳолат юзасидан, Оила ва хотин-қизлар бошқармаси бошлиғи дарҳол жараённи тўхтатиб, қизларга ва гўзаллик салони раҳбариятига жамиятда юриш-туриш қоидаларига амал қилиши, миллий қадриятларни ҳурмат қилиши юзасидан тушунтириш ишлари олиб борилди.
Шу каби ҳолат Наманганда ҳам кузатилган эди. Давлатобод тумани “Навбаҳор” маҳалласида яшовчи, 2007 йилда туғилган вояга етмаган қиз видеоси гўзаллик салони ходимлари томонидан салон мижозлари ва каналидаги обуначилар сонини кўпайтириш мақсадида олинган.
Изоҳ (0)