Узоқ йиллик кўрсаткичларнинг поёни, 5 та пенальти ва 733 кунлик голсиз серия. Суперлига 4-тури рақамларда

Футбол бўйича Ўзбекистон чемпионатининг 4-тур баҳслари 13—15 июнь кунлари бўлиб ўтди.

«Championat.asia» нашри мавсум рестартидан кейинги дастлабки турга оид бир қатор статистикани тақдим этди.

Суперлига 4-тури рақамларда

0 — Коронавирус пандемияси туфайли Суперлига ўйинлари мухлисларсиз давом эттирилмоқда. 4-тур баҳсларининг ҳеч бирига мухлислар киритилмади. Маълум муддат ўйинлар томошабинларсиз ўтади.

1 — «Қўқон-1912» ҳимоячиси Бобиржон Акбаров 2020 йилги чемпионатда биринчи автогол муаллифи сифатида тарихда қолди. Дастлабки 3та турда ҳеч бир футболчи ўз дарвозасини ишғол қилмаган эди.

2:2 — Суперлиганинг 4-туридан ўрин олган 3та учрашувда 2:2 ҳисоби қайд этилди. Қизиғи яна учта учрашувда 1:0 ҳисоби кузатилди.

3 — «Металлург» ярим ҳимоячиси Дониёр Нарзуллаев «Локомотив» билан учрашувда (3:0) учта голли узатма беришга муваффақ бўлди.

5 — Суперлиганинг 4-турида ҳакамлар дарвозаларга жами 5 марта пенальти белгилади. Шундан иккитаси голга айланди холос. «Насаф» — «Навбаҳор» учрашувида иккала жамоа аъзолари Умар Эшмуродов ва Азизбек Турғунбоев, «Сўғдиёна»да Шоҳруз Норхонов 11 метрли жарима тўпидан гол ура олмади. «Андижон» вакили Жамшид Ҳасанов эса «Бухоро» билан ўйиннинг ўзида икки бор пенальти тепди ва иккаласида ҳам гол урди.

5 — ОКМК Ўзбекистон чемпионати тарихида бир ўйинда 5 нафар ўйинчини алмаштирган дастлабки клубга айланди. Ундан олдин бошланган «Бунёдкор» — «Қўқон-1912» учрашувида мураббийлар учтадан ўзгаришни амалга оширишди.

10 — Қаршининг «Насаф» клуби 4 та турдан сўнг 10 очко билан мусобақа жадвалида пешқадамликни қўлга олди.

11 — ОКМК клуби «Қизилқум» майдонида сўнгги бор 2000 йилда ғалаба қозонган эди. Орадан 11 йил ўтиб олмалиқликлар ушбу жамоани сафарда мағлуб эта олди.

18 — Суперлиганинг 4-туридан ўрин олган 7 та учрашувда жамоалар жами 18та гол урди. Таққослаш учун 1-турда 22 та, 2-турда 15 та ва 3-турда ҳам 18 та гол урилган эди.

33 — «Сўғдиёна» Ўзбекистон чемпионати доирасида сўнгги бор «Пахтакор»ни 1999 йилги мавсум мағлуб этган эди. Шундан кейин бўлиб ўтган ўзаро 33 та учрашувда жиззахликлар ғалаба қозона олмаганди. Бақоев шогирдлари 21 йилдан сўнг илк бор «шерлар»ни мағлуб этди.

35 — «Локомотив» клуби ўз майдонида сўнгги бор 2017 йилги мавсумда мағлуб бўлган эди. 2018 ва 2019 йилги чемпионатларда «темир йўлчилар» ўз стадионида ҳеч кимга ютқазмаганди. «Металлург» «Локомотив»нинг ўз майдонидаги 35 ўйинлик мағлубиятсиз сериясига чек қўйди.

42 — «Металлург» футболчиси Аброр Тошқўзиев «Локомотив» билан ўйинда захирадан майдонга тушганидан 42 сония ўтгач гол уришга эришди. Эътиборлиси Андрей Шипилов майдонга туширган яна бир футболчи Шаҳзод Убайдуллаев ҳам «темир йўлчилар» дарвозасига тўп киритди.

93:56 — «Бухоро» — «Андижон» учрашувида мезбонлар вакили Беҳруз Саъдилоев гол урганида таблода мана шу дақиқаларни кўрсатиб турганди. Ушбу гол «Бухоро»га 2020 йилги мавсумдаги даслабки очкони келтирди ва 4-турдаги энг кеч урилган голга айланди.

247 — «Навбаҳор» дарвозабони Ўткир Юсупов жорий йилги мавсумда ҳозирча энг узун «қуруқ серия» қайд этган дарвозабонга айланди. Юсупов 1-турда «Пахтакор» билан баҳснинг 88-дақиқасида гол ўтказиб юборганидан сўнг «Локомотив» ва «Андижон» билан ўйинларда ўз дарвозаси даҳлсизлигини сақлаб қолди. 4-турда «Насаф»га қарши учрашувнинг 66-дақиқасида гол ўтказиб юборган посбоннинг «қуруқ серия»си 247 дақиқага етди.

290 — «Бухоро»нинг бу мавсумдаги «қуруқ серия»си айнан 290 дақиқага тенг бўлди. Даслабки учта турда умуман гол ура олмаган (270 дақиқа) бухороликлар «Машъал» билан баҳснинг 21-дақиқасида мавсумдаги илк голини уришди. Шундай қилиб 2020 йилги Ўзбекистон чемпионатида гол ура олмаган клуб қолмади.

733 — «Навбаҳор» ҳужумчиси Забиҳилло Ўринбоев Ўзбекистон чемпионатида сўнгги бор 2018 йил 12 июнь куни «Металлург» сафида «Насаф»га гол урган эди. Шундан -кейин 733 кун ўтгач (2 йил-у 2 кун) Ўринбоев яна "Насаф" дарвозасига тўп киритишга эришди.