Дунё ва ўзбек спортига оид сўнгги кунларнинг муҳим хабарлари дайжести билан танишинг.

Ўзбекистон

Олимпиадага йўл оладиган спортчиларни эмлаш жараёни давом этмоқда. 2 июль куни боксчиларда вакцинациянинг иккинчи босқичи ўтказилди. Ўзбекистон бокс делегацияси тайёргарликнинг сўнгги босқичини мусобақа бўлиб ўтадиган жойда ўтказиш учун 4 июль куни Токиога жўнаб кетди. Аввалроқ Токио—2020 Олимпиадасига борадиган барча ўзбекистонлик спортчи, мураббий ва расмий вакиллар вакцинациядан ўтказилиши маълум қилинганди.

Суперлиганинг 12-тур ўйинлари 2—4 июль кунлари бўлиб ўтди. «Турон» ўз майдонида «Металлург»ни мағлуб этган ҳолда, Суперлига 2021 йилги мавсумидаги илк ғалабасини қўлга киритди. Аввалроқ яйпанликлар жамоасини тажрибали мутахассис Игорь Шквирин қабул қилиб олганди. Яна бир баҳсда «Қизилқум» ўз уйида «Машъал»ни таслим этди ва муваффақиятли сериясини давом эттирди. 3 июль куни эса «ОКМК» жамоаси «Қўқон-1912»ни енгиб, иккинчи ўринга кўтарилди. «Андижон» сўнгги сониялардаги гол эвазига «Навбаҳор»дан устун келди. 4 июль куни турнинг сўнгги учта ўйин бўлиб ўтди. «Пахтакор» Тошкент дербисида «Локомотив»дан устун келди. «Бунёдкор» эса «Сурхон»ни тор-мор келтирди. Марказий ўйин Қаршида «Насаф» ва «Сўғдиёна» ўртасида кечди. Унда жиззахликлар мавсумдаги илк мағлубиятни қабул қилиб олди.

Жасур Жалолиддинов «Андижон»дан кетди. «Навбаҳор»га қарши ўйиндан кейин футболчи ўзнинг Instagram саҳифаси орқали бу ҳақда маълум қилди. Жалолиддинов фаолиятини Тошкентнинг «Локомотив» клубида давом эттиради. Бу ҳақда «темир йўлчилар» матбуот хизмати маълум қилди. 2020 йилда Россияда сарсон бўлган футболчи 2021 йилнинг март ойида «Андижон» футболчисига айланганди.

Иброҳимхалил Йўлдошевга «Женоа»дан қизиқиш бўлмоқда. Россиялик шарҳловчи ва инсайдер Нобель Арустамянга кўра, генуяликлар «Пахтакор»нинг 20 ёшли ҳимоячиси трансферини ушбу ёзда амалга оширмоқчи. Аввалроқ унга Бельгиянинг «Беерсхот» клубидан қизиқиш борлиги хабар қилинганди.

Жалолиддин Машарипов «Ан-Насср»га қайтди. Ўтган мавсумни БААнинг «Шабоб ал-Аҳли» клуби ижара асосида ўтказган ўзбекистонлик футболчи яна Саудия Арабистони клубига қайтди. Машарипов БАА чемпионатида 12 та ўйин ўтказиб, 2 та гол ва тўртта голли узатма амалга оширди. Саудияликлар Машариповни қишки трансфер ойнасида ўз сафига қўшиб олган ва легионерлар лимити сабаб дубайликларга ижарага берганди.

Жаҳон

Евро—2020 чорак финал ўйинлари якунланди ва ярим финал жуфтликлар маълум бўлди.Италия терма жамоаси саралаш баҳсларини ҳисобга олганда Европа чемпионатидаги кетма-кет 15-ғалабани қўлга киритди. Бу мусобақа рекорди ҳисобланади. Бельгиянинг 14 ўйинлик ғалабали сериясига эса якун ясалди. Роберто Манчиси жамоаси кетма-кет 32 та ўйиндан буён ютқазмаяпти ва бу борада шахсий рекордини яхшилаб олди.

Евро—2020 кашфиёти узоқ муддатга сафдан чиқди. Италия терма жамоаси чап қанот ҳимоячиси Леонардо Спинаццола Бельгияга қарши ўйиннинг 79-дақиқасида оғир жароҳат олди ва кўз ёш тўкиб, майдонни тарк этди. Қайд этилишича, унинг товон пайларида ёрилиш юзага келган. Бу жароҳат сабаб ҳимоячи бир йилгача бўлган муддатга сафдан чиқиши мумкин. Спинаццола Ервопа чемпионатида икки бор учрашувнинг энг яхши ўйинчиси деб топилганди.

Англия терма жамоаси ўз тарихида илк бор кетма-кет еттита ўйинда ўз дарвозасидан тўп ўтказмади. Инглизларнинг қуруқ серияси 662 дақиқадан бери давом этмоқда. «Уч шерлар» 1996 йилдан кейин илк бор Европа чемпионати ярим финалида ўйнайди.

Швеция ҳужумчиси Патрик Шик Евро—2020 даги голлари сонини 5 тага етказди ва энг яхши тўпурар Криштиану Роналдуга етиб олди. Шунингдек, Шик Чехия сафида битта йирик мусобақада доирасида гол уриш бўйича Милан Барошнинг рекордини такрорлади. Барош Евро–2004 да бешта гол урган ва мусобақа тўпурари бўлганди.

Дания 1992 йилдан бери илк бор Евро ярим финалига чиқди. Ўшанда данияликлар мусобақа ғолибига айланганди. Шунингдек, Дания Евронинг дастлабки икки ўйинида мағлуб бўлиб, якунда ярим финалга қадар етиб келган биринчи жамоага айланди.

Копа Америка—2021 да ҳам чорак финал баҳслари якунланди. Унга кўра Бразилия, Перу, Аргентина ва Колумбия ярим финал йўлланмасига эга бўлди.

Тони Кроос фаолиятини қачон ва қаерда якунламоқчи эканини айтди

Ўйлашимча, 2023 йил мос келадиган палла, мен 33 ёшда бўламан. Ҳали «Реал» билан шартномани яна бир ёки икки йилга узайтириш борасида қарор қабул қилишимга тўғри келади. Бироқ бир нарсага мутлақо ишончим комил, фаолиятимни «Реал»да якунлайман.

Германиядаги барчани айбламоқчи эмасман, чунки кўплаб мухлислар ўйинимга яхши баҳо берди. Бироқ айрим ҳолларда 11 йиллик меҳнатимдан кейин ҳам одамлар менга етарли баҳо бермаётгандек туюлади. Испанияда эса ҳаммаси бошқача. Етти йил аввалги биринчи ўйинимдан ҳозиргача одамлар мендан миннатдор.

Тони Кроос, «Реал» футболчиси

Трансфер янгиликлари

«Манчестер Юнайтед» «Реал» ҳимоячиси Рафаэл Варанни қўлга киритмоқчи. Инглиз клуби Варан трансфери учун 45 миллион евродан ортиқ маблаф сарфлаш ниятида эмас. Мадридликлар эса футболчи учун 70 миллион сўрамоқда. «Манчестер Юнайтед» келишувга ярим ҳимоячи Пол Погбани қўшишга тайёр. Ҳар икки футболчининг амалдаги шартномаси 2022 йил ёзида якунланади. АBC нашрининг хабарига кўра, Варан «Ман Юнайтед»да йилига 12 миллион евро маош олади. «Реал» эса янги шартномада унга 7 миллион таклиф қилган.

Аввалроқ «Юнайтед» Жейдон Санчо трансферини ҳал қилган маълум бўлганди. Шунингдек, жамоа ярим ҳимояга номдор футболчи олиб келиш ниятида.

«ПСЖ» Лионель Мессига «Барселона»дан фойдалироқ таклиф билан чиқди, дея хабар қилмоқда АS. Ҳозирда футболчининг эътибори Америка Кубогига қаратилган. Мусобақа тугагандан кейин парижликлар музокараларга киришмоқчи. Эслатиб ўтамиз, Месси 1 июлдан эътиборан эркин агент мақомини олган.

Ҳозирда каталонлар Месси билан янги келишув борасида музокаралар олиб бормоқда. Леонинг шартларини қаноатлантириш учун жамоа маошлар масаласини кўриб чиқиши ва бир нечта футболчисидан воз кечишига тўғри келади. Акс ҳолда молиявий фейр-плей билан боғлиқ муаммолар пайдо бўлиши мумкин. Хабарларга кўра, «Барселона» Умтити ва Пьяничга шартномани бекор қилишни таклиф қилган. Бироқ икки футболчи ҳам бу таклифни рад этган.