Қайси ҳисоб кўп қайд этилди, энг кам ғалаба кимда, қайси мамлакат легионерлари кўпроқ? Суперлига 2021 йилги мавсумига оид қизиқарли статистика

Футбол бўйича Ўзбекистон Суперлигасининг 2021 йилги мавсуми ўз ниҳоясига етди. «Дарё» мусобақанинг ортда қолган мавсумига оид бир қатор статистикаларни тақдим этади.

• Энг кўп ғолиб бўлган жамоа — «Пахтакор». Тошкентликлар 19 та ўйинда рақибларидан устун келган.
• Энг кўп дуранг натижа қайд этган жамоа — «Сўғдиёна». Жиззахликлар Суперлигада 11 марта муроса йўлини танлаган.
• «Металлург» мавсум давомида 17 марта мағлубиятга учраган. Бу чемпионатдаги энг ёмон натижа.
• «Пахтакор» 58 та гол уриб, чемпионатнинг энг сермаҳсул жамоаси бўлди. «Турон» 16 та гол билан энг кам гол урган жамоага айланди.

• «Пахтакор» чемпионатдаги энг кам гол ўтказиб юборган жамоа. Чемпион ўз дарвозасидан 18 та гол олиб чиққан.
• «Сурхон» жамоаси дарвозаси 43 марта ишғол қилинган. Термизликлар мавсумнинг энг кўп гол ўтказиб юборган клуби бўлди.
• «Пахтакор» уй ўйинларида энг кўп ғалаба қозонган жамоа (13 та ўйиндан 11 тасида ғолиб бўлган).
• «Андижон» эса уй ўйинларида энг кам ғалаба қозонган жамоа (13 та ўйиндан 2 тасида рақибларидан устун келган).

• «Металлург» уй ўйинларида 8 марта мағлубиятга учраган. Бу чемпионатнинг энг ёмон натижаси.
• «Пахтакор» меҳмондаги учрашувларда 8 марта ғалаба қозониб, энг яхши натижани қайд этган.
• «ОКМК» меҳмондаги учрашувларда энг кам мағлубиятга учраган (2 марта) жамоага айланди.
• «Сурхон» Суперлиганинг меҳмондаги ўйинларида энг кўп мағлубиятга учраган (10 та) жамоа бўлди.
• Энг кўп мухлис ташриф буюрган ўйин: 3-турдан ўрин олган «Навбаҳор» — «Насаф» баҳси. Учрашувга 19358 мухлис кирган. Ўйин нурсиз дуранг билан якунланган.

• Энг кўп қуруқ ўйин ўтказган дарвозабонлар Милан Митрович («Сўғдиёна»), Ўткир Юсупов («Навбаҳор»): улар 12 та ўйинда ўз дарвозаси дахлсизлигини сақлаб қолган.
• Энг йирик ҳисоб «Насаф» ва «Сурхон» жамоалари ўртасидаги ўйинда қайд этилди. Унда қаршиликлар 6:0 ҳисобида ғалаба қозонди.

• Ўз уйида энг йирик ҳисобда мағлубиятга учраган клуб ҳам «Сурхон» бўлди. Термизликлар «Бунёдкор»га 1:5 ҳисобида, «Пахтакор»га эса 0:4 ҳисобида таслим бўлди.
• Энг кўп қайд этилган ҳисоб — 1:0. Мавсумдаги 28 та (15,4%) ўйин мезбонларнинг минимал ҳисобдаги ғалабаси билан тугаган.

• Энг кўп дақиқа ҳаракат қилганлар: Ўткир Юсупов ва Игнатий Нестеров. «Навбаҳор» ва «Қизилқум» дарвозабонлари дам олишсиз ҳаракат қилди — 2340 дақиқа.
• Энг кўп вақт ҳаракат қилган майдон ўйинчиси эса Алишер Салимов («Сурхон») бўлди — 2333 дақиқа.
• Суперлигада майдонга тушган энг ёш футболчи Нодир Абдураззоқов. «ОКМК» футболчиси 2021 йил 31 июль куни «Сўғдиёна»га қарши ўйинда майдонга тушган вақтда 17 ёш 2 ой 4 кунлик бўлган.
• Чемпионатнинг энг ёши катта футболчиси Камолиддин Тожиев. «Металлург» ҳимоячиси 2021 йил 21 ноябрда «Турон» жамоасига қарши ўйинда майдонга тушди. Тожиев ўшанда 38 ёш 6 ой 18 кунлик эди.
• «Гол+пас» тизимида энг кўп очко тўплаган футболчи Драган Черан. Ҳужумчининг ҳисобида 20 очко (16+4) мавжуд.

• Энг сермаҳсул дуэт — «Пахтакор» футболчилари Драган Черан (16 та гол) ва Шерзод Темиров (8 та гол).
• Драган Черан («Пахтакор») ва Ҳусайн Норчаев («Насаф») уйдаги ўйинларда энг кўп гол урган. Ҳужумчилар 10 тадан голни ўз ҳисобига ёздириб қўйган.
• Меҳмондаги учрашувларда энг кўп гол урган ҳужумчи Темурхўжа Абдухолиқов бўлди. «Локомотив» ҳужумчиси ҳисобида 8 та гол мавжуд.

• Энг кўп легионер жалб қилинган мамлакат — Сербия (18 футболчи).
• Энг ёш гол муаллифи — Умарали Раҳмоналиев. «Бунёдкор» клуби футболчиси «Турон» (3:1) дарвозасини ишғол қилган вақтда 18 ёш 2 ой 4 кунлик бўлган.
• Энг ёши катта гол урган ҳужумчи — Камолиддин Тожиев. «Металлург» футболчиси «Машъал» дарвозасини ишғол қилганда 37 ёш 10 ой 17 кунлик бўлган.
• Энг кўп сариқ карточка олган жамоа — «Сўғдиёна» (68).
• Энг кам сариқ карточка олган жамоа — «Насаф» (41).
• Энг кўп қизил карточка олган жамоа — «Насаф» (6).