Футбол бўйича Ўзбекистон Cоcа Cоlа Суперлигаси 6-тур учрашувлари 25 июнь, пайшанба куни старт олади. 25 июнь куни мусобақа 6-турининг учта учрашуви ўтказилади.
«Қўқон-1912» жамоаси ўз уйида «Сурхон»ни қабул қилади. Мавсумни муваффақиятсиз бошлаган термизликларни Қўқонда мураккаб ўйин кутиб турибди. Мазкур жамоалар шу кунга қадар Ўзбекистон чемпионатида 18 бор тўқнаш келган, уларнинг тўққизтасида «Сурхон»нинг қўли баланд келган бўлса, саккиз ўйинда водийликлар зафар қучган. Яна бир учрашувда дуранг қайд этилган.
Турнинг марказий учрашуви «Бунёдкор» ва «Локомотив» ўртасидаги пойтахт дербиси бўлади. Ўтган турда «Пахтакор»га йирик ҳисобда мағлуб бўлган Вадим Абрамов шогирдлари яна бир қийин синов олдида турибди. Мазкур жамоалар шу вақтга қадар 26 марта ўзаро ўйин ўтказган. Уларда икки жамоа ҳам 9 мартадан ғалаба қозонган ва 8 ўйинда дуранг қайд этилган. Ушбу жамоалар ўртасидаги сўнгги учта ўйиндан буён ғолиб номи аниқланмай келади.
Амалдаги чемпион «Пахтакор» мазкур турда аутсайдерлар қаторида бораётган «Қизилқум» меҳмони бўлади. Жамоалар чемпионат тарихида ўзаро 40 та ўйин ўтказган. Уларнинг 33 тасида «шерлар»нинг қўли баланд келган бўлса, «Қизилқум» ҳисобида битта ғалаба бор. Яна 6 ўйинда дуранг қайд этилган. Ўзбекистон чемпионати тарихидаги энг йирик ҳисоб мазкур жамоалар ўртасидаги ўйинда қайд этилган. 2007 йилда «Пахтакор» Навоийдаги баҳсда рақиби дарвозасига жавобсиз 11 та тўп киритганди.
26 июнь куни «Андижон» жамоаси «Сўғдиёна» майдонига сафар қилади. «Насаф» эса ўз уйида «Бухоро»ни қабул қилади. 27 июнда «Металлург» ва «Навбаҳор» жамоалари ўзаро тўқнаш келса, «Машъал» Олмалиқда ОКМК билан ўйнайди.
Cоcа Cоlа Суперлига
6-тур баҳслари
25 июнь, пайшанба
18:15 «Қўқон-1912» — «Сурхон» | «Спорт ТВ»
20:15 «Бунёдкор» — «Локомотив» | «Спорт ТВ»
20:15 «Қизилқум» — «Пахтакор» | «Маҳалла»
26 июнь, жума20:00 «Сўғдиёна» — «Андижон» | «Маҳалла»
20:00 «Насаф» — «Бухоро» | «Спорт ТВ»
27 июнь, шанба19:00 «Металлург» — «Навбаҳор» | «Спорт ТВ»
19:00 ОКМК — «Машъал» | «Маҳалла».
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)