«Навбаҳор» бош мураббийи Андрей Канчельскис ПФЛ ташкилотчилигини кескин танқид қилди. ПФЛ раҳбари эса унга икки бор жавоб қайтарди

Наманганнинг «Навбаҳор» клуби бош мураббийи Андрей Канчельскис Суперлига 10-туридан ўрин олган «Сурхон»га қарши ўйиндан сўнг марказлашган чемпионат, майдон сифати ва ташкилотчилик масалаларини кескин танқид қилди.

Канчельскис сўзларини «Championat.asia» қуйидагича келтиради:

Ростини айтганда ташкилотчиларни умуман тушунмадим. Марказлаштирилган ҳолда ўтказиш ҳақида видеоконференцияда барчамиз ўйинларни 18:00 дан кейин ўтказишга келишиб олгандик. Негадир биз 17:00 да ўйнадик. Нима учун кимгадир мумкин, кимгадир мумкин эмас. Менга айтинг-чи, «Пахтакор» 17:00 да ўйнаяптими? Агар бугун худо кўрсатмасин футболчилардан бирини бошини офтоб урганда ва ўзидан кетиб қолганда нима бўларди? Футболчининг ота-онасининг кўзига қандай қарардингиз? Қозоннинг «Рубин» клубида Пётр Бистров билан шундай бўлганди...

Соат 17:00 да ўйнадик, устимиздан куляпсизми? Келинглар, унда 15:00 да ўйнайлик. Бу футбол эмас-ку! Яна майдоннинг ҳолатини қаранг. Бугун Суперлигада битта ўйин ва биз энг ёмон майдонда ўйнадик. Нима учун у ҳолда марказлашган ҳолда ўйнаяпмиз? Кимга керак бундай марказлашган чемпионат? Марказлашган тарзда ўтказилаётган экан унда шароит яратиб беринглар. Ёки сув йўқ, ёки бошқа нарса йўқ. Футболчиларни устидан кулиш яхши эмас.

Футболчиларнинг соғлиги ҳақида гапиряпмиз, лекин 40 даража иссиқда футбол ўйнатяпсизлар. Бундай футбол кимга керак? Футболчи худо сақласин ерга йиқилиб тушса нима қиламиз, ким жавоб беради?

Келинглар, майдонларни яхшилайлик деяпмиз, аммо амалда ҳеч нима қилинмаяпти. «Пахтакор» ҳеч қачон 17:00 да ўйнамаяпти. Улар футболчилари ҳолати ҳақида қайғуради? Мен ҳам қайғураман.

Бугун футболчилар майдонда югуриш эмас, юришга қийналишди. Футбол жозибаси ҳақида нимадир дейишга ҳайронман. Бу «кошмар», бу ақлга сиғмайди. Биз марказлаштирилган мусобақа ўтказиш учун келиб қанча пул сарфладик. Яшаш, овқатланиш ва бошқалар. Яна ҳеч қандай шароит йўқ. Қандай футбол ўйнаш мумкин?

Биринчи голни тоза ургандик, агар уни ҳисобга олишганида ўйин бошқача бўларди. Йигитларга мана шундай иссиқда ўйнашгани учун раҳмат айтаман. Гол ўтказиб юборганимиздан кейин таслим бўлишмади ва ҳисобни тенглаштирдик. Барчага соғлиқ тилайман, аммо бундай ташкилотчиликни умуман кутмагандим.

Беленков борасидаги саволлар менга эмас.

Мен бундай майдонда 90 йилларда ўйнардим. Ҳозир эса 21-аср! Бу томорқанинг ўзи.

Андрей Канчельскис, «Навбаҳор» бош мураббийи

Канчельскис биз ҳақимизда фикр билдирди. Ва, албатта, у ҳам бизнинг фикрларимизни эшитиши адолатдан бўлади.

«Навбаҳор» олдида фақатгина илк тур учун виждонимиз қийналади. Чунки клуб ўшандаги илк бўлимда ғалабага, иккинчи бўлимда эса камида дуранг натижага лойиқ эди. Аммо клубнинг сўнгги уч ўйинини ёдга олинг, на «Бунёдкор» билан, на «Қизилқум» билан ва на «Сурхон» билан «Навбаҳор» ўз даражасида ўйнай олди. Жамоанинг ўйини чиқмади. Ҳатто «Қизилқум» билан ўйиндан кейин клуб раҳбарларидан бири бизга бундай ғалаба керак эмас, деганини ҳам эшитдик. Мана шундай паллада Канчельскис мавзуни ўзидан соқит қилиб юбориши ғалати. У жамоа ўйини учун жавоб бериши тўғрироқ.

Карантин вақтида бутун Ўзбекистонда футбол тўхтаганида ҳам «Навбаҳор» машғулотларни давом эттирди. Яъни, раҳбарият унга барча шароитни яратиб берди. Аммо қолган клублар танаффусга чиқиб ҳам Канчельскис жамоаси билан деярли бир формада қайтиб келишади. Мураббий шу ҳақда ҳам ўйласа тўғрироқ бўлади.

Россиялик мутахассис яқиндагина «Навбаҳор» стадиони майсасига жавобгар кишини танқид қилиб, дарвозабон сувда чўмилгани ҳақида айтди. Аммо ўша нуқтада рақиб жамоа дарвозабони ҳам ҳаракат қилди. Худди кеча «Сурхон» ҳам «Навбаҳор» билан бир хил шароитда тўп сургани каби.

«Сурхон»га қарши ўйин учун «Навбаҳор» поезд ва самолёт йўқ бир вақтда Термизга 12 соат йўл босиб бориши ва бундан иссиқроқ шароитда тўп суриши керак эди. Сир эмаски, Термиздаги стадионда ҳам прожектор яхши эмас. Марказлашган формат эса қийинчиликдан Канчельскисни қутқарди.

Бизда чилла чиқиб бўлган. Шундай вақтда аёл футболчилар йиллар давомида тўп суриб келишди ва нолишмади. Мана шундай вақтда мураббий ҳам эркак бўлиб, жамоаси ўйини нега ўхшамаётгани ҳақида гапириши керак. Айтайлик, Равшан Ҳайдаров «Сурхон»ни қабул қилиб олганига кўп бўлмади, аммо жамоа ўйинини ўзгартира олди. Канчельскис учун яна қанча вақт керак деган савол мухлислар томонидан берилиши тўғрироқ.

ТТЙМИ («Навбаҳор» – «Сурхон» ўйини бўлиб ўтган стадион – изоҳ «Дарё») майсаси анча яхши. Бу ерда миллий терма машғулотлар ўтади, яқин-яқингача «Жар» ва ТТЙМИ стадионларида Суперлига учрашувлари ўтказилган. U-19 Осиё чемпионати учун ОКМК, «Локомотив», «Бунёдкор» стадионларини оз бўлса-да асраш учун, биз мана шу икки стадиондан ҳам фойдаланишга мажбур бўлмоқдамиз. Бу стадионларни мен жуда ёмон демаган бўлардим.

Марказлашган чемпионат масаласида биз барча мураббийларни йиғдик, Навоий, Қаршидан мураббийлар келди, фикр алмашдик. Аммо Канчелсксис унда иштирок этмади. Яқинда эса ФИФА кунлари масаласида йиғилиш бўлди, Тошкентда бўла туриб мураббий унда ҳам иштирок этмади. Чемпионат ҳақида қайғурадиган мутахассислар ўша куни ЎзПФЛ билан бирга бўлди. Умуман қорасини кўрсатмаётган мураббий биз билан нимани келишгани ҳақида айтаётганини тушунмадим.

Биз ўзимиздан ўтаётганларини тан оламиз, камчиликларимиз кўп, мавжуд вазиятни ўзгартириш учун тиним билмаяпмиз. «Навбаҳор»нинг инобатга олинмаган голини ўрганишни сўраб, ЎФАга мурожаат билан ҳам чиқамиз. Наманган футболига бефарқ бўлмаган мухлислар бундан яхшироғига албатта муносиб. Ишонамизки, футболчилар тез орада ўз ўйинларини топиб олади. «Навбаҳор» инфратузилма жиҳатидан халқаро майдонда ўйнашга тайёр бўлиб улгурди. Балки бу йил клуб икки мусобақадан (Суперлига ва Ўзбекистон Кубоги – «Дарё»)бирида муваффақият қозонар ҳам, бундан ЎзПФЛ хурсанд бўлади.

Диёр Имомхўжаев, ПФЛ директори вазифасини бажарувчи

Мусобақалар ўтказиш регламентидан кўчирма:

9.7. Учрашувлар қуйидаги вақтларда старт олиши мумкин:

• Суперлигада соат 18:00 дан эрта бўлмаган вақт (шанба, якшанба, байрам кунлари, шунингдек, вазиятга қараб ва ЎзПФЛ қарори билан айрим вилоятлардаги ўйинлар бундан мустасно бўлиши мумкин);
• U-21 чемпионатида соат 12:00 дан эрта бўлмаган вақт (ёз ойларида учрашувни соат 17:00 дан эрта бошлаш тақиқланади);
• Барча қолган учрашувлар вақти ЎзПФЛ томонидан белгиланган ва телерадиокомпания билан келишилган вақтда бошланади;
• Учрашувни 21:00 дан кеч бошлаш мумкин эмас.

Айрим вилоятлардаги ўйинлар деганда прожектори талабга жавоб бермайдиган стадионлар назарда тутилган. Вазиятга қараб деганда эса ҳаво ҳарорати, шом кириши ва шунга ўхшаш ҳолатлар инобатга олинган. Жорий мавсум 18 та учрашув 18:00 дан эрта бошланган. Ҳозирча эътироз фақатгина «Навбаҳор» устози томонидан бўлди.

5.14. Мезбон жамоа мусобақаларнинг расмий календарь учрашуви бошлангунга қадар 20 кундан кеч бўлмаган муддатда ЎзПФЛ маъмуриятига учрашувнинг бошланиш вақти борасида таклиф бериши зарур. ЎзПФЛ учрашув вақтини телетрансляция ҳуқуқини қўлга киритган компания билан келишиб белгилайди.

Барча клубларга тақвим бир вақтда берилди, аммо ҳеч бир клубдан эътироз бўлмади, ҳатто «Навбаҳор»дан ҳам. Аммо натижа қониқарли бўлмаганидан кейин Канчельскис эътироз билдирди. Арпа уни баҳона дегани аслида шу.

Икки кун аввал «Бухоро» ва «Қизилқум» клублари ҳам 17:00 да учрашув ўтказди. Олдинда яна 6 та учрашув шу вақтда ўтиши керак. «Навбаҳор»дан бошқа бирор клуб эътироз қилмади. Ўша куни «Навбаҳор»нинг рақиби ҳам айнан шу вақтда тўп сурди.

Регламентнинг 9.7 бандига қайтамиз, U-21 учрашувларини ёз ойларида 17:00 дан эрта бошлаш мумкин эмас дейилган. 21 ёшгача бўлган футболчилар, яқин-яқингача Олий лига клублари ҳам ёз ойларида 16:00 да майдонга чиққан даврлар бўлган, «Навбаҳор»нинг ёши катта мухлислари буни яхши эслашади. 21 ёшгача футболчи август ойида 17:00 да ўйнаса, аёл футболчилар шу вақтда ўйнаса, миллионлаб маош оладиган футболчи ва мураббийлар нега ўйнай олмайди?

ТТЙМИ стадиони майсаси ҳақида ОАВ қолган мутахассислардан фикр олса, тўғрироқ бўлади. Ўйинлар ўтаётган 7 стадиондан майсаси нисбатан қониқарсизи ТТЙМИ эмас, футбол ичидагилар буни жуда яхши билади.

«Пахтакор» билан ёнма-ён бораётган ОКМК иштирокидаги учрашув ҳам 17:00 га қўйилган. Аммо Миржалол Қосимов бир оғиз эътироз қилгани йўқ. Менимча, ҳамма меъёрни айнан бир клуб билан солиштириш тўғри эмас. "Навбаҳор" мухлисларидан бир нарсани тўғри тушунишларини сўраймиз, натижа қила олмаган биргина мураббий сиз-у бизнинг ўртамизга фитна сочмасин, ҳар сафар футболчилар, майдонлар ва бошқаларни айблашдан тийилсин. Ва иложи бўлса мураббийлар иштирокидаги йиғилишларда қатнашиб, фикрларини аввалдан билдирсин, ғолиб чиқа олмаганидан кейин эмас

Диёр Имомхўжаев, ПФЛ директори вазифасини бажарувчи