Ўзбекистон футбол ассоциацияси Тартиб-интизом қўмитасининг навбатдаги йиғилиши бўлиб ўтди.
Унда бир қатор футболчи ҳамда расмийларга нисбатан тартиб-интизом чоралари белгиланди. Жумладан, Суперлиганинг 16-тури доирасидаги «Металлург» — «Машъал» учрашуви (1:2) якунлангач, «Металлург» жамоаси расмий вакили Шавкат Саидов ўзини нопрофессионал тутган ҳолда, агрессивлик билан «Машъал» бош мураббийи Александр Хомяковнинг кўкрак қисмига муш билан зарба берганди. Ушбу хатти-ҳаракати учун Шавкат Саидовга бир йил муддатга футбол оид ҳар қандай фаолият билан шуғулланишдан четлаштириш интизом чораси қўлланилди.
Шунингдек, клубдан ушбу расмий шахсга 2021 йилги мавсум учун ПФЛ томонидан тақдим этилган лицензияни 3 кун муддат ичида топшириш талаб этилди.
Йиғилишда яна бир қатор футболчилар ва расмийларга нисбатан жазолар белгиланди:
Суперлига 16-тури доирасидаги «Металлург» — «Машъал» учрашуви якунидан сўнг «Металлург» футбол клуби аъзолари стадионда оммавий тартибсизликлар келтириб чиқариб, ҳакамлар шаънига ҳақоратли сўзлар ишлатди. «Металлург» футбол клуби учрашувда тартиб-интизомни таъминламагани, майдон ва унинг атрофида вужудга келган тартибсизликларнинг олди олинмагани учун жазоланади ва клубга нисбатан жарима интизом чораси қўлланилади.
Суперлиганинг 16-туридан ўрин олган «Пахтакор» — «ОКМК» учрашувида олмалиқликлар футболчиси Аббос Отахонов баҳснинг 82-дақиқасида тўп учун кураш бўлмаган вазиятда тирсаги билан рақиб ўйинчисининг юзига зарба бериб, ўйин қоидасини қўпол равишда бузгани учун 3 та ўйинга дисквалификация қилинди ва унга нисбатан жарима интизом чораси қўлланилди.
U-18 чемпионати 13-тури доирасидаги «Арал Самали U-18» — «Навбаҳор U-18» учрашуви 45+2-дақиқасида «Арал Самали U-18» жамоаси футболчиси Бахит Пердебаев ва «Навбаҳор U-18» жамоаси ўйинчиси Сарвар Баҳодиров ножўя сўзлар ишлатиш орқали бир-бирини ҳақорат қилди ва кейинроқ тажовузкор хатти-ҳаракатлар амалга оширилди. Шу сабабли Сарвар Баҳодиров ҳамда Бахит Пердебаевга нисбатан 2 та ўйинга четлаштириш интизом чораси қўлланилди.
«Арал Самали U-18» – «Навбаҳор U-18» учрашувининг 71-дақиқасида «Арал Самали U-18» футболчиси Зулпухар Қуваншибаев рақиб ўйинчисига қасддан жароҳат етказиш мақсадида рақиб оёғига зарба бергани учун 3 та ўйинга дисквалификация қилинди.
Изоҳ (0)