Ўзбекистон Суперлигасида 12-тур якунланди. 15 июнь, якшанба куни чемпионат доирасидаги учта ўйин бўлиб ўтди.
Турнинг энг марказий баҳси Қаршида кечди. Унда “Насаф” ўз майдонида “Навбаҳор”га қарши майдонга тушиб, 1:0 ҳисобида ғалаба қозонди. Учрашувнинг 77-дақиқасида Драган Черан томонидан киритилган ягона гол “Насаф”га уч очко тақдим этди. Сербиялик ҳужумчи ҳакам томонидан белгиланган 11 метрлик жарима зарбасини аниқ амалга ошириб, жорий мавсумдаги иккинчи голини урди.
Мазкур ғалабадан сўнг “аждарлар” 28 очко билан турнир жадвалида пешқадамликни мустаҳкамлади. “Навбаҳор” эса 20 очко билан 4-ўринда бормоқда.
Яна бир қизиқарли учрашув Жиззахда бўлиб ўтди. Унда номинал мезбон “Хоразм” Самарқанднинг “Динамо” клубини қабул қилди. Ўйин жуда қизғин ўтди. Дастлаб, урганчликлар 26-дақиқада ҳисобни очди. Орадан атиги 5 дақиқа ўтиб, “Динамо” ҳисобни тенглаштирди.
Иккинчи бўлимнинг 60-дақиқасида самарқандликлар ҳисобда олдинга чиқди. Ойбек Ўрмонжонов рақиб ҳимоясидаги чалкашликлардан унумли фойдаланган ҳолда жамоасининг иккинчи голини киритди.
Натижа ўйиннинг охиригача ўзгармади. Шундан сўнг “Динамо” 25 очко билан жадвалнинг иккинчи поғонасига кўтарилди. “Хоразм” эса 14 очко билан 9-ўринда бормоқда.
Куннинг сўнгги учрашуви Термизда ўтказилди. Унда маҳаллий “Сурхон” жамоаси Фарғонанинг “Нефтчи” клубини қабул қилиб, 0:0 ҳисобида дуранг ўйнади. Ҳар икки жамоа гол уришга ҳаракат қилган бўлса-да, дарвозабонларнинг ишончли ҳаракати ва ҳужумчиларнинг ноаниқ зарбалари сабабли ҳисоб очилмади.
Натижада жамоалар 1 очкодан бўлишиб олишди. “Сурхон” 14 очко билан 10-ўринда, “Нефтчи” эса 20 очко билан 5-поғонада бормоқда.
Ўзбекистон Суперлигаси
14-тур
15 июнь, якшанба
“Насаф” — “Навбаҳор” 1:0
Гол: 1:0 — Драган Черан (77)
“Хоразм” — “Динамо” 1:2
Голлар: 1:0 — Мурод Бобожонов (26), 1:1 — Фирдавс Абдураҳмонов (31), 1:2 — Ойбек Ўрмонжонов (60)
“Сурхон” — “Нефтчи” 0:0
Изоҳ (0)