Сўнгги 24 соат ичида Исроил ҳужумлари сабаб Ғазо сектори бўйлаб камида 81 фаластинлик ҳалок бўлган, яна 400 дан ортиқ тинч аҳоли жароҳат олган. Бу ҳақда анклав ҳудудида фаолият кўрсатувчи соғлиқни сақлаш идоралари маълум қилди.
Исроил кучлари қочқинлар вақтинча истиқомат қилаётган стадион яқинига зарба бериб, камида 11 киши, жумладан болаларни ўлдирди. Тармоқларда инсонлар тупроқ остида кўмилиб қолган яқинларини қуруқ қўл ва белкураклар билан қутқариб олишга ҳаракат қилаётгани акс этган кадрлар пайдо бўлди.
Бундан ташқари, анклавнинг Ал-Маваси ҳудудида яна бир оиланинг беш аъзоси, хусусан ота-она ва 3 нафар фарзанд уйқуда бўлган вақти ўлдирилди. Бошқалар билан қўшиб ҳисоблаганда, мана шу ҳудуднинг ўзида 14 киши ҳалок бўлди.
Секторнинг Туффаҳ туманида эса камида 8 киши, жумладан 5 нафар бола ҳалок бўлди. Ҳужум нишони ўз уйидан кўчирилган фуқаролар вақтинча яшаётган муассаса эди.
“Бу ҳудуд чодирлар билан тўла эди. Энди чодирлар қум остида қолган. Биз жасадларни чиқариб олиш учун қўлларимиз билан соатлаб ковладик. Бу ерда на қидирувдагилар бор, на террорчилар. Фақат тинч фуқаролар ва болалар бўлган”, деди гувоҳлардан бири Аҳмад Қишавий Reuters’га.
Исроил томони эса Туффаҳга зарба юзасидан баёнот бериб, гўёки таҳдид туғдирган номаълум шахс нишонга олинганини иддао қилган.
“Ҳужумдан аввал тинч аҳолига зарар етказмаслик учун чоралар кўрилди”, дея даъво қилган яҳудий расмийлари.
Сулҳ ва музокаралар:
АҚШ президенти Дональд Трамп Ғазо масаласига тўхталиб, томонлар келаси ҳафта ичида сулҳга эришиши мумкинлигини айтди. Тель-Авивда эса 28 июнь куни ҳукуматга қарши намойиш бўлиб ўтди. Улар Нетаньяху идорасидан ҲАМАС ихтиёрида сақланаётган асирларни озод қилиш учун келишув имзолашни талаб қилмоқда.
Бу 2023 йилдан буён давом этаётган можаро якунланишига кичик бўлса-да, умид бермоқда. Бироқ таҳлилчилар Қатар мезбонлик қилаётган сулҳ музокаралари натижасига катта умид боғламаяпти. Икки миллиондан ортиқ аҳоли қамал қилинган анклавда эса қон тўкилиши тўхтамаяпти.
Изоҳ (0)