Исломобод Пекин билан радарларда кўринмаслик хусусиятига эга жами 40 та қирувчи самолёт учун шартнома имзолагани ҳақида хабарлар пайдо бўлди. Покистон мудофаа вазири Хаважа Асиф буни инкор қилиб чиқди.
Телевидение орқали чиқиш қилган вазир бу борадаги миш-мишларни инкор қилиб, шундай деди:
“Менимча, бу фақат медиа хабарларида бор. Бу Хитойнинг мудофаа маҳсулотларини сотиш учун яхши реклама, биласиз”, деган Хаважа Асиф.
Сўнгги ҳафталарда дунёнинг қатор нашрлари Покистон Хитойдан 40 та J-35А самолётини харид қилиши мумкинлиги, илк партия 2025 йил августидан етказиб берилиши ҳақида ёзган эди. Қолаверса, Пекин катта чегирма билан тузилган шартнома доирасида ўз иттифоқчисини узоқ масофали PL-17 ҳаво-ҳаво ракеталари билан ҳам таъминлаши ҳақида хабарлар пайдо бўлди.
J-35А қирувчи самолёти Хитойнинг Shenyang Aircraft Corporation компанияси томонидан ишлаб чиқилган бўлиб, АҚШ ва Россиянинг бешинчи авлод платформаларига муқобил сифатида кўрилади.
Хаважа Асифнинг мазкур баёноти Покистон расмийлари томонидан бешинчи авлод қирувчилари ҳақида билдирилган илк расмий изоҳ бўлди.
Изоҳ (0)