Россияда эркак тишини олдирганидан сўнг вафот этгани юзасидан жиноий иш қўзғатилди. Бу ҳақда Тергов қўмитасининг минтақавий тергов бошқармаси хабар берди.
Маълум қилинишича, Перм шаҳрида яшовчи 35 ёшли Евгений Кунавин кучли тиш оғриғи билан стоматологга мурожаат қилган. Шифокор ақл тишини олиб ташлаган, аммо операциядан кейин беморда асоратлар бошланган. Жумладан, инфекция сепсисга айланиб кетган.
Эркак бир ярим ҳафта давомида реанимацияда ўпкани сунъий шамоллатиш аппаратида бўлган. Ижтимоий тармоқларда унинг учун донорлик қони йиғиш ташкил этилган. Евгений кома ҳолатига тушиб, бир неча кундан сўнг вафот этган. Марҳумнинг хотини ва икки фарзанди қолган.
Ҳодиса юзасидан Россия Жиноят кодексининг 109-моддаси 2-қисми (шахснинг ўз касбий мажбуриятларини лозим даражада бажармаслиги оқибатида эҳтиётсизлик билан ўлимга сабаб бўлиш) бўйича жиноий иш қўзғатилган. Ҳозирда ҳодисанинг барча тафсилотларини аниқлаш бўйича тергов ҳаракатлари олиб борилмоқда.
Изоҳ (0)