АҚШ президенти Дональд Трамп амалда Россия ва Украинага нисбатан янги чора-тадбирлар кўриш ниятини билдирди, аммо аниқ нималар назарда тутилгани ҳақида маълумот бермади. Трансляцияни C-SPAN телеканали олиб борди.
Журналистлар Америка раҳбаридан Россиянинг гўёки Украинадаги фуқаролик объектига берган зарбаси ҳақида шарҳ сўрашган.
“Биламан. Баъзи воқеалар юз беришини кўрасиз”, дея жавоб берди Трамп Вашингтон яқинидаги Эндрюс ҳарбий базасидан Техасга вайронкор сув тошқини оқибатларини бартараф этиш жараёни билан танишиш учун жўнашдан олдин.
АҚШ маъмурияти раҳбари бу борада бошқа ҳеч қандай изоҳ бермади.
10 июль куни Трамп NBC телеканалига берган интервьюсида душанба куни Россияга оид муҳим баёнот беришни режалаштираётганини маълум қилди. Америка раҳбари тафсилотларни келтирмаган, бироқ Украинадаги вазиятни тартибга солиш жараёни қандай бораётганидан кўнгли тўлмаганини яна бир бор таъкидлаган.
Бундан аввал Трамп Россияга нисбатан “кичик сюрприз”га ишора қилиб, Владимир Путиннинг ҳаракатларидан “мамнун эмаслигини” таъкидлаган эди.
Шу билан бирга, АҚШнинг Украинадаги махсус элчиси Кит Келлог 14 июль куни Киевга келишини ва у ерда бир ҳафта қолишини маълум қилди.
Шу фонда Reuters манбаларга таяниб хабар беришича, АҚШ президенти иккинчи муддати бошланганидан бери Украинага Америка захираларидан биринчи қурол-яроғ туркумини юборишни буюрган. Трамп Конгресснинг рухсатисиз қурол-яроғларни тезкор тарзда жўнатиш имконини берувчи Президентлик захираларидан фойдаланиш ваколати (PDА) механизмини ишга туширди. Агентлик манбаларига кўра, тўпламнинг қиймати тахминан 300 миллион долларни ташкил этиши мумкин. Унга, эҳтимол, Патриот ракеталари ва GMLRS бошқариладиган снарядлари киритилади.
Изоҳ (0)