Россия раҳбари Владимир Путин 25 йил олдин Борис Ельцин билан суҳбатда президент бўлишга тайёр эмаслигини айтганини очиқлади. У бу ҳақда журналист Павел Зарубинга берган интервьюсида маълум қилди.
Путиннинг сўзларига кўра, у ўзини давлат раҳбарлигига тайёр деб ҳисобламаган. Аммо мамлакатни бошқаришга рози бўлгач, биринчи навбатда ўзи ва Россия олдида турган вазифаларни қандай ҳал қилишни ўйлаган.
Шунчаки (президенти бўлишни) хоҳламаганим учун эмас. Биринчидан, мен учун бу кутилмаган ҳолат эди. Иккинчидан эса, ҳа, эҳтимол, хоҳламагандирман, чунки ўзимни бунга тайёр деб ҳисобламаганман. Асосан шунга боғлиқ эди...
Мамлакатимизни сақлаб қолиш ва ривожлантириш учун жуда кўп, долзарб ва айни пайтда ҳаётий муҳим масалалар бор эди. Шунинг учун мен, тўғрисини айтсам, бу нимани англатиши ҳақида, албатта, ўйладим, лекин энг аввало олдимизда турган вазифаларни қандай ҳал қилиш тўғрисида бош қотирдим. Буни уддалай оламанми, эплай оламанми, деб ўйлардим, деди у.
Путин 2024 йил март ойида ҳам Ельцин билан суҳбати ҳақида гапирган эди. Ўшанда у 1999 йил август ойида Ельцинга иқтисодиёт ва хавфсизлик соҳасидаги муаммолар кўлами туфайли президент бўлишга тайёр эмаслигини айтганини очиқлаган. Путин вазиятни ёмонлаштиришдан қўрққанини тан олган. Агар ўтмишга қайтиш имкони бўлганида, худди шундай жавоб қайтаришини қўшимча қилганди.
Изоҳ (0)