AQSH prezidenti Donald Tramp bir paytlar Rossiya prezidenti Vladimir Putinni Ukrainaga hujum qilishdan qaytarmoqchi bo‘lib, “Moskvani bombardimon qilish” bilan tahdid qilgan. U huddi shu mazmunda Xitoyga ham ogohlantirish bergan. Bu haqda yozib olingan audiolarga tayanib CNN xabar berdi.
Tramp Rossiya rahbariga ogohlantirish berganini ta’kidlagan.
“Agar Ukrainaga kirsangiz, men Moskvani bombardimon qilaman. Sizni ogohlantiryapman. Boshqa ilojim qolmaydi”, degan Tramp Putinga qarata.
Putin esa bunga javoban unga ishonmasligini aytgan. Lekin AQSH prezidenti Putin unga “10 foiz” ishonganini ta’kidlagan. Keyinroq Tramp Xitoy rahbari Si Szinpinga ham shu mazmunda tahdid qilgan. Tramp agar Xitoy Tayvanga bostirib kiradigan bo‘lsa, Pekinni bombardimon qilishini bildirgan.
“U meni aqldan ozgan deb o‘yladi. Chunki oramizda hech qanday muammo yo‘q edi”, dedi Tramp Si haqida.
Trampning bu tahdidlarining audiosi u prezidentlikka ikkinchi marotaba o‘z nomzodini qo‘yganda tarqalib ketgan. Xususan, bu gaplar Nyu York va Floridadagi 2024-yilgi mablag‘ yig‘ish tadbirlarida yozib olingandi. Keyinchalik bu audio materiallar Josh Dousi, Tayler Peyjer va Isaak Arnsdorf tomonidan qo‘lga kiritilib, ular o‘zlarining “2024” nomli kitobida ba’zi ma’lumotlarni taqdim etgan. Audiofayllar dastlab efirga uzatilmagan. Tramp ma’muriyati esa audiotasmalarga izoh berishdan bosh tortgan.
Audioda Trampning yopiq eshiklar ortida boy xayriyachilar bilan suhbati aks etgan. Jumladan, u nafaqat o‘zining tashqi siyosat strategiyasi, balki talaba namoyishchilarni deportatsiya qilish borasida ham o‘z fikrini bildirgan. Tramp agar Jo Bayden o‘rniga prezident bo‘lgan taqdirda, Ukraina va G‘azodagi mojarolarga barham berishini ma’lum qilgan. Prezident hozirda ham bu ikki urushni tugatishga va’da berib kelmoqda.
AQSH prezidenti 8-iyul kuni ham Putinning tinchlik kelishuviga rozi bo‘lmayotganidan noroziligini aytgan.
“Men Putindan mamnun emasman. Men ulardan juda noroziman”, dedi Tramp Vazirlar mahkamasi yig‘ilishida.
Izoh (0)