Remote.com номли халқаро ишга ёллаш ва HR масалаларига ихтисослашган платформа иш ва шахсий ҳаёт ўртасидаги мувозанат энг яхши йўлга қўйилган давлатлар индексини эълон қилди. Тадқиқотда дунёнинг энг йирик иқтисодиётига эга 60 та давлат иштирок этди.
Баҳолаш бир нечта мезонларга, жумладан, йиллик пуллик таътил кунлари сони, болали бўлишда бериладиган ижтимоий ёрдам, минимал иш ҳақи, соғлиқни сақлаш сифати, мамлакатдаги хавфсизлик даражаси ва аҳоли ўртасидаги бахтлилик кўрсаткичига асосланди.
Рўйхатда биринчи ўринни Янги Зеландия эгаллади. Бу мамлакатда ишчилар йилига 32 кун иш ҳақи сақланадиган дам олиш ҳуқуқига эга. Шунингдек, фарзандли бўлган ота-оналарга 26 ҳафтагача тўланадиган туғуруқ таътили берилади.
Иккинчи ўринга Ирландия лойиқ деб топилди. У ерда соғлиқни сақлаш тизими кучли ва шаффоф бўлиб, энг кам иш ҳақи даражаси бошқа давлатларга нисбатан юқори. Учинчи ўринни эса Бельгия эгаллади. Бу давлат ҳам минимал иш ҳақи бўйича Европадаги етакчи мамлакатлардан бири ҳисобланади. Шунингдек, Бельгияда аҳолига ижтимоий ҳимоя кўрсатиш бўйича турли кафолатлар ҳам берилади.
Рейтингнинг кучли ўнлигига Германия, Норвегия, Дания, Канада, Австралия, Испания ва Финляндия каби давлатлар киритилди. Рўйхатдаги энг яхши ўнликдан еттита ўринни Европа давлатлари эгаллади.
Охирги ўринлардан Нигерия, Миср, Эфиопия ва Ироқ каби давлатлар билан бирга Қўшма Штатлар ҳам жой олди. АҚШ ушбу рейтингда 59-ўринни эгаллади.
Remote.com мутахассисларининг таъкидлашича, ҳам карьерага, ҳам шахсий ҳаёт ва оилага бирдек вақт ажрата оладиган аҳоли яшайдиган давлатларда инсонлар ўзини бахтли, соғлом ва хавфсиз ҳис қилади. Бу эса уларнинг иш унумдорлигига ҳам ижобий таъсир кўрсатади.
Изоҳ (0)