Шимолий Корея Россияга 28 мингта контейнерда қурол ва артиллерия снарядлари етказиб бергани маълум бўлди. Бу ҳақда Жанубий Корея разведкасига таяниб Yonhap хабар берди.
КХДР Россия армиясига 152 миллиметрли калибрдаги 12 миллиондан ортиқ ўқ-дори юборган. Бундан ташқари, 2024 йил октябрь ойидан бери 13 мингга яқин ҳарбий жўнатган. Улар Россия армиясига Украина қўшинларини Курск вилоятидан сиқиб чиқаришга ёрдам берган.
Шимолий Кореянинг Украинага қарши урушдаги иштироки аллақачон мамлакат иқтисодиётига 20 миллиард доллардан ортиқ даромад келтирган, дейди Жанубий Кореянинг КIDА таҳлил маркази.
Тахминларга кўра, Шимолий Корея Россия қўшинларини зарур ўқ-дориларнинг камида ярми билан таъминламоқда. Ғарб разведкаси Россиянинг 2024 йилдаги ўқ-дори ишлаб чиқариш ҳажмини 2–2,3 миллион дона атрофида деб баҳолаган.
КХДР узоқ масофали артиллерия қуроллари, ялпи ўт очиш тизимлари, миномётлар ва баллистик ракеталар етказиб берган. Украина разведкасига кўра, Россияга 120 та “Коксан” ўзиюрар артиллерия қурилмаси, 120 та реактив ўт очиш тизими ва 148 та КН-23 ҳамда КН-24 (“Хвасон”) баллистик ракеталари юборилган.
Июнь ойида Шимолий Корея “Россияга етказиб бериш” учун ўз тарихидаги энг йирик ҳарбий заводни қура бошлади. У Хичхон туманида фаолият юритаётган мудофаа корхонаси ёнида қурилмоқда.
Изоҳ (0)