АҚШ президенти Дональд Трамп агар Эрон янги ядровий объектлар қурадиган бўлса, улар йўқ қилинишини айтди. У бу ҳақда ўзининг Truth Social ижтимоий тармоғида ёзди.
Эрондаги учта ядро объектининг барчаси бутунлай вайрон этилган ва/ёки йўқ қилинган. Уларни қайта ишга тушириш учун йиллар талаб этилади. Агар Эрон буни хоҳласа ҳам, унга бу объектларни тиклашдан кўра, учта жойда янгидан қуриши афзал бўларди, чунки улар яна йўқ қилинади, деб ёзган Трамп.
Эрон “Ядро қуролини тарқатмаслик тўғрисидаги” шартномадан чиқиши ва уранни 60 фоиздан юқори даражада бойитишни бошлаши мумкин. Мамлакат парламентнинг миллий хавфсизлик ва ташқи сиёсат қўмитаси аъзоси Иброҳим Ризоий буни тасдиқлаган. У ташқи босим кучайган тақдирда Теҳрон шундай қадам ташлашини айтган.
Ризоийга кўра, ҳозиргача Эрон ўз ядровий имкониятларини тўлиқ ишга солмаган, аммо замонавий центрифугалар ишлаб чиқариш ва ядровий ҳамкорликни кенгайтириш каби “бошқа стратегик чоралар”ни қўллаши мумкин.
Исроил 13 июндан бошлаб Эронга тинимсиз ҳужум қилиб, унинг ядровий объектлари, мудофаа тизимлари, юқори мартабали ҳарбий амалдорлари ва ядрочи олимларини нишонга олди.
АҚШнинг урушдаги иштироки
22 июнь куни АҚШ Исроилнинг ҳаракатларига қўшилиб, учта асосий объектга — Фордо, Натанз ва Исфаҳонга авиазарбалар берди. Ҳужумда бункер бомбалардан ҳам фойдаланилди. Марказий разведка бошқармаси бошлиғи Жон Ретклифф операция Эрон ядровий дастурига жиддий зарар етказганини маълум қилди. Зарбалардан кўп ўтмай АҚШ президенти Дональд Трамп Эрон ва Исроил ўртасида ўт очишни тўхтатиш режими кучга кирганини эълон қилди, буни иккала томон ҳам тасдиқлади.
Изоҳ (0)