АҚШнинг собиқ президенти Барак Обама маъмурияти 2016 йилги сайловлардан олдин ҳам, кейин ҳам Россия уларнинг натижасига киберҳужумлар орқали таъсир кўрсатмаганини билган. Бундай маълумотлар АҚШнинг амалдаги раҳбари Дональд Трамп маъмурияти эълон қилган ҳужжатларда келтирилган, дея хабар бермоқда The New York Post.
Нашр маълумотларига кўра, Миллий разведка директори Тулси Габбард 100 саҳифадан ортиқ электрон хатлар, хизмат ёзишмалари ва бошқа қайдларни ошкор қилган. У буни “Обама амалдорларининг 2016 йилда президент Трампнинг ғалабасига тўсқинлик қилиш мақсадидаги фитнаси” деб атаган.
Ҳужжатлар орасида 2016 йил 12 сентябрдаги разведка ҳамжамиятининг баҳоси ҳам бор. Унда “хорижий рақиблар сайлов инфратузилмасига кенг кўламли ва сезиларсиз киберҳужумларни муваффақиятли амалга ошириш имкониятига эга эмаслар ва, эҳтимол, бундай имкониятга эга бўлмайдилар” дейилган.
Ўша йилнинг 7 декабрида ўша пайтдаги Миллий разведка директори Жеймс Клеппернинг идораси ҳам шунга ўхшаш хулосага келган.
“Бизда натижаларни ўзгартириш мақсадида сайлов инфратузилмасини кибер-манипуляция қилингани ҳақида ҳеч қандай далил йўқ”, дейилади баёнотда.
Бироқ Клеппер бу маълумотларни яширган. У ва АҚШдаги бошқа расмийлар Москва Демократик партия миллий қўмитасига кириб олганини ва Трамп фойдасига президентлик пойгасига аралашганини даъво қила бошлаган.
Маълум бўлишича, 2016 йил 9 декабрь куни бир қатор амалдорлар, хусусан, Марказий разведка бошқармаси директори Жон Бреннан, давлат котиби Жон Керри ва Федерал қидирув бюроси директори ўринбосари Эндрю Маккейб Оқ уйда учрашиб, Обамадан АҚШ сайловларига “Россиянинг аралашуви”ни текшириш бўйича кўрсатма олган.
Изоҳ (0)