Украина президенти Владимир Зеленский 17 июль куни мамлакатда 6 ой ичида қурол ишлаб чиқариш миқдори оширилишини маълум қилди. Бу ҳақда Euronews хабар берди.
Украина раҳбари кейинги 6 ой ичида мудофаа секторида сезиларли ўзгаришлар бўлишини маълум қилган.
“Мудофаа сектори ва қурол ишлаб чиқаришда сезиларли ўзгаришлар бўлади. Ҳозирда аскарларимиз қўлидаги барча қуролларнинг тахминан 40 фоизи Украинада ишлаб чиқарилган. Бу кўрсаткичнинг 6 ой ичида 50 фоиздан кам бўлмаслигини таъминлаймиз”, деди Украина раҳбари.
Украина Россиянинг ҳужумларига қарши туриш ва унга зарба бериш учун узоқ масофага учувчи дронлар ишлаб чиқаришни йўлга қўйган. Мамлакат сўнгги пайтларда Киевга ҳарбий ёрдам кўрсатилиши камайишидан хавотирда эди. Шу сабабли Украина қурол ишлаб чиқаришни кучайтиришга қарор қилинган. АҚШ президенти Дональд Трамп 11 июль куни Вашингтон НАТО орқали Украинага қурол-яроғ, жумладан, Patriot ҳаво ҳужумидан мудофаа тизимларини юборишини маълум қилганди.
Оқ уй 17 июль куни Швейцарияга Patriot ҳаво мудофаа тизимларини етказиб бериш кечиктирилишини маълум қилган. Бунга Украина ҳар доимгидан ҳам кўпроқ ҳарбий техникаларга муҳтожлиги сабаб қилиб кўрсатилган. АҚШ ва Швейцария ўртасидаги ҳарбий қурол етказиб бериш тўғрисидаги келишув 2027 йилдан кучга кириши лозим эди.
“АҚШ Украинани қўллаб-қувватлашни кучайтирмоқчи. Ҳозирда Киевга ҳарбий техникани етказиб бераётган давлатлар тез орада ушбу ёрдамни тўхтатиш ниятида. Шу боис Вашингтон Patriot ҳаво ҳужумидан мудофаа тизимларини етказиб беришнинг устувор йўналишларини қайта кўриб чиқишга қарор қилди”, дейилади Швейцария Мудофаа вазирлиги баёнотида.
Изоҳ (0)