Озарбайжоннинг Ханкенди шаҳрида ўтказилган йирик медиа-форумда Илҳом Алиев Тоғли Қорабоғни тиклашда илк совғани Ўзбекистон берганини айтди. Бу ҳақда Озарбайжон президенти матбуот хизмати хабар берди.
“Ўзбекистонлик биродарларимизнинг кўмаги биз учун ҳамиша қадрли бўлган. Биласизки, Қорабоғнинг тикланишига биринчи совға Ўзбекистон томонидан берилган. Муҳтарам президент Шавкат Миромонович ташаббуси билан Фузулий шаҳрида ўзбек халқининг буюк фарзанди Мирзо Улуғбек номини олган 960 ўринли мактаб барпо этилди. Фузулий шаҳрида ушбу мактабни Шавкат Миромонович билан биргаликда очдик”, деган Озарбайжон раҳбари тадбирда иштирок этган Ўзбекистон журналистика ва оммавий коммуникациялар университети ректори Шерзодхон Қудратхўжанинг бир неча саволларига берган жавобида.
Илҳом Алиев форумдан икки кун аввал ушбу мактабда бўлганини, унда 500 нафардан ортиқ бола ўқиётганини қайд этди.
“Собиқ қочқинларни Фузулийга қайтариш жараёни ҳали бошланғич босқичда эканига қарамай, у ерда шунча болалар таҳсил олмоқда. Биз буни жуда қадрлаймиз, бу Ўзбекистон президентининг самимий биродарлик ишораси, Озарбайжонга ҳудудни тиклашда кўрсатган ёрдами бўлди”, деган Илҳом Алиев.
Ўтган қарийб 30 йилда Фузулий буткул вайрон бўлиб, “арвоҳ шаҳар”га айланган эди. Ҳарбий ҳаракатларга қадар бу ерда 18 минг нафарга яқин аҳоли истиқомат қилган. 2020 йилда қайта тиклаш ишлари бошлангач, шаҳарга аста-секин ҳаёт қайтмоқда.
Шавкат Мирзиёев 2021 йилнинг апрелида Туркий тилли давлатлар ҳамкорлик кенгашининг видеоконференция шаклида ўтказилган норасмий саммитида Ўзбекистон Тоғли Қорабоғ заминидаги кўҳна обидалар, маданият ва маърифат масканларини тиклаш ишларига ҳисса қўшишга тайёр эканини билдирганди. Ўзбекистон туҳфа сифатида Тоғли Қорабоғда мактаб қуриши айтилганди.
2023 йилнинг августида Шавкат Мирзиёевнинг Озарбайжонга ташрифининг иккинчи кунида икки давлат раҳбарлари рафиқалари билан бирга Фузулий шаҳрига ташриф буюриб, Ўзбекистондан туҳфа сифатида қурилган мактаб очилишида иштирок этганди.
Мирзо Улуғбек номидаги 1-сонли мактабда 40 та синфхона, 6 та лаборатория, 2 та информатика хонаси, 5 та функсионал ўқув хонаси, мажлислар ва спорт заллари, ошхона, кутубхона мавжуд. Футбол майдони, дам олиш ва тадбирлар ўтказиш учун жойлар, югуриш йўлаклари ташкил қилинган.
Изоҳ (0)