“Дунё” ахборот агентлиги Покистон ва Россияда оғир аҳволда қолган икки ўзбекистонлик ватанга қайтарилганини маълум қилди.
Хабар қилинишича, Покистондаги Ўзбекистон фуқароси Э.Х. мамлакат элчихонасига мурожаат қилиб, оғир ижтимоий вазиятга тушиб қолганини, вақтинчалик турар жой ва кундалик эҳтиёжлар учун зарур маблағга эга эмаслигини маълум қилиб, ёрдам сўраган.
Унинг мурожаати элчихона томонидан назоратга олиниб, қисқа фурсат ичида зарур консуллик-ҳуқуқий ва моддий ёрдам кўрсатиш бўйича чоралар кўрилди. Унга Ўзбекистонга қайтиш учун тегишли консуллик гувоҳномаси расмийлаштирилди ва элчихона ходимлари ҳамда ҳомийлар кўмагида авиачипта харид қилинди.
Фуқаро куни кеча Uzbekistan Airways авиакомпаниясининг Исломобод—Тошкент авиарейси билан ватанга қайтарилди.
Россиядага фуқарога ҳам ёрдам кўрсатилди
Маълум қилинишича, Челябинск вилояти Киштим туманида жойлашган “Русские пряники” корхонасида вақтинча ишлаш учун борган ўзбекистонлик С.А. Бош консулхона дипломатлари билан учрашув чоғида моддий томондан қийин аҳволда қолгани сабабли доимий яшаш манзилига етиб олиши учун ёрдам сўраган.
Ўтказилган суҳбат давомида маълум бўлишича, С.А. шу йил май ойида ташкиллаштирилган тартибда мазкур корхонага ишга келган. Унинг Челябинск вилоятига етиб келгунига қадар йўл харажатлари, ётоқхона ва бошқа кўринишдаги тўловлар иш берувчи томонидан амалга оширилган.
Фуқаро вақтинча меҳнат фаолиятини амалга ошириш учун рухсат берувчи патентни расмийлаштириш мақсадида уч маротаба имтиҳон топширган. Аммо рус тилини билиш даражасини берувчи сертификатни расмийлаштира олмагани сабабли Россияда ноқонуний ҳуқуқий мақомда қолган.
Уни Ўзбекистонга қайтариш учун Екатеринбург шаҳрига олиб келинди ва вақтинча бошпана билан таъминланди. Шундан сўнг Ўзбекистон дипломатлари ва фаол ватандошлар кўмагида Екатеринбур—Тошкент авиарейсига чипта харид қилиб берилди.
19 июль куни Екатеринбург—Тошкент йўналиши бўйича самолётда Ўзбекистон Бош консулхонаси ходимлари томонидан доимий яшаш манзилига кузатилди.
Ўзбекистонга қайтарилаётган фуқаролар
2025 йилнинг бошларида Россиянинг Тива Республикаси Оқ Довурак шаҳрида вақтинча ишлаётган тўрт нафар Ўзбекистон фуқароси ватанга қайтарилди. Фуқароларнинг яшаш жойида содир бўлган кучли ёнғин натижасида уларнинг ҳужжатлари, шу жумладан, паспортлари йўқолган.
27 февраль куни Маккада оғир касалликка чалинган ўзбекистонлик ватанга қайтарилди. Февраль ойи охирида Россияда икки боласи билан қийин вазиятда қолган аёл Ўзбекистонга қайтарилди.
2025 йил 5 март куни Россиянинг Владивосток шаҳрида оғир тан жароҳати олган Ўзбекистон фуқароси ватанга қайтарилди. Март ойининг ўрталарида Новосибирскдаги Бош консулхонаси кўмагида Россиянинг Саха республикаси Нерюнгри шаҳрида қийин ҳаётий вазиятга тушиб қолган она ва унинг тўрт нафар фарзанди Ўзбекистонга қайтарилди. 17 март куни ота-она қарамоғисиз қолган 10 нафар вояга етмаган бола Қозоғистондан Ўзбекистонга қайтарилди. Шунингдек, Россияда ота-она қарамоғисиз қолган 30 нафар бола Ўзбекистонга қайтарилди.
14 июнь куни Туркияда ўгай отаси жинсий тажовуз қилган ўзбекистонлик қиз ватанга қайтарилди. 20 июнда эса Уммонда тутқунликда сақланган аёл болалари билан Ўзбекистонга қайтарилди.
Роппа-роса 1 ой аввал, 21 июнда Эрондаги 60 га яқин Ўзбекистон фуқаролари Туркманистон орқали ватанга қайтарилган.
Изоҳ (0)