Ўзбекистон терма жамоаси ва Москванинг “ЦСКА” клуби футболчиси Аббосбек Файзуллаев Туркиянинг “Башакшеҳир” клуби билан шартнома имзолашга яқин турибди. Бу ҳақда футболчига яқин манба “Дарё”га маълум қилди. Унга кўра, “армиячилар” ҳамда истанбулликлар Файзуллаев борасида келишувга эришган.
Футболчи яқин кунларда Туркияга учиб боради ҳамда тиббий кўрикдан ўтиб, “Башакшеҳир” билан шартнома имзолайди. Турк клуби Файзуллаев учун 7,5 миллион евро тўлайди. Бироқ футболчи Истанбул жамоаси билан неча йиллик битим имзолаши маълум эмас.
“ЦСКА” бугун Россия Премьер Лигаси доирасида “Оренбург”га қарши майдонга тушади. Файзуллаев ушбу баҳс учун қайдномага киритилмади.
Агар ушбу трансфер амалга ошса, Файзуллаев “Башакшеҳир” сафидаги иккинчи ўзбекистонлик футболчига айланади. Аввалроқ Истанбул клуби “Рома”дан Элдор Шомуродовни мавсум охиригача ижарага олган эди.
Маълумот учун, Аббосбек Файзуллаев ўтган мавсум “ЦСКА” таркибида барча мусобақалар доирасида 39 та учрашувда майдонга тушиб, 3 та гол ва 8 та голли узатма муаллифига айланган. Футболчининг “армиячилар” билан амалдаги шартномаси 2026 йил ёзигача тузилган. Transfermarkt портали унинг нархини 8 миллион еврога баҳолаган.
Изоҳ (0)