Жанубий Кореянинг собиқ президенти Юн Сок Ёл 9 июль куни қайта ҳибсга олинди. Бу ҳақда BBC хабар берди.
Собиқ президент 2024 йили мамлакатда сиёсий нотинчлик келтириб чиқарганликда айбланмоқда. У апрель ойида 6 соатлик ҳарбий тартиб буйруғи учун импичментга учраганди. Сеул марказий округи судьяси 9 июль куни Юн “далилларни йўқ қилиши мумкинлигидан қўрқиб”, уни ҳибсга олишга ордер берган. Жанубий Кореянинг ҳибсга олинган биринчи президенти бўлган Юн ҳарбий ҳолат жорий этишга уриниши туфайли қўзғолонга раҳбарлик қилганликда айбланиб суд қилинмоқда.
“9 июль куни бўлиб ўтган 7 соатлик эшитув чоғида махсус прокурорлар гуруҳи 5 та асосий айблов бўйича уни ҳибсга олишга ордер берган”, деб хабар берди Жанубий Кореянинг Yonhap ахборот агентлиги.
Айбловларга кўра, Юн ҳарбий ҳолат эълон қилишдан олдин вазирлар маҳкамаси аъзоларининг баъзиларини йиғилишга таклиф қилмай, уларнинг ҳуқуқларини поймол қилган. Собиқ президент дастлаб айбловларни рад этиш учун адвокатлари билан бирга суд мажлисида қатнашган. Сўнгра ҳибсга олиш тўғрисидаги қарорни кутиш учун Сеул тергов изоляторига олиб кетилган.
У дастлаб январь ойида ҳибсга олинганди. Терговчилар уни Сеул марказидаги қароргоҳидан ҳибсга олиш учун баррикадаларни кенгайтириб, тиканли симларни кесиб ташлаган. Юн икки ой ўтгач, унинг ҳибсга олинишини техник сабабларга кўра бекор қилганидан кейин озод қилинган. Аммо суд барибир бекор қилинмаган эди. Ўша пайтда у айбдор деб топилганда, умрбод қамоқ ёки ўлим жазосига ҳукм қилиниши ҳам мумкин эди.
Қайд этилишича, Юн “ҳарбий ҳолат эълон қилинишини оқлайдиган реакцияни келтириб чиқариш учун” Шимолий Корея устидан ҳарбий дронларни учиришга буйруқ берган. Бу борада прокурорлар далилларга эга. Бошқа юқори лавозимли амалдорлар ҳам қўзғолон кўтариш ва ҳарбий ҳолат эълон қилиш борасида ўз ваколатларини суиистеъмол қилиш билан айбланган.
Жанубий Корея қонунчилигига кўра, президентлар қўзғолонда айбланса, суд қилинади. Аммо энди Юн президент эмаслиги ҳисобга олинса, собиқ президент бошқа жиноятларда ҳам айбланиб, суд қилинишига ҳеч қандай тўсиқ йўқ. Мамлакатнинг янги президенти Ли Чже Мёнг июнь ойида Юннинг импичментидан кейин навбатдан ташқари сайловлар натижасида сайланган эди. У мамлакатда демократияни мустаҳкамлашга ваъда берган. Чже Мёнг ҳарбий ҳолат эълон қилиниши ҳамда собиқ маъмуриятнинг бошқа ҳаракатларини тергов қилиш учун махсус адвокатлар гуруҳини тайинлаган.
Изоҳ (0)