Жанубий Корея 2025 йил бошида денгиздан қутқариб олинган 6 нафар шимолий кореялик қочқинни ўз ватанига қайтариб юборди. Бу ҳақда Al Jazeera хабар берди.
Қочқинлар март ва май ойларида кемада икки давлат денгиз чегараси орқали сузиб ўтганди. Сеулнинг маълум қилишича, улар уйга қайтиш истагини бир неча бор билдириб, ўзларининг “тўлиқ ризолиги билан” ватанига қайтарилмоқда.
Сеул ва Пхеньян ўртасида ушбу қочқинларни қайтариш борасида бир неча бор музокаралар ўтказилган. Икки мамлакат ўртасидаги бу алоқалар Жанубий Кореянинг янги президенти Ли Чже Мён муносабатларни мустаҳкамлаш устида ишлаётганидан дарак бериб турибди.
Ҳокимият тепасига келганига бир ой тўлгани муносабати билан Жанубий Корея президенти ўтган ҳафтада матбуот анжумани ўтказган. Унда Ли Сеул ўз иттифоқчиси АҚШ билан келишган ҳолда Пхеньян билан муносабатларни яхшилаш устида ишлаши лозимлигини айтган. Бу мулоқотни тўхтатиш эса “аҳмоқона ҳаракат” бўлиши таъкидланган.
Жанубий Корея ҳарбийлари июнь ойида мамлакатлараро чегара орқали Шимолий Кореяга қарши ташвиқот олиб бораётган радиокарнайларни ўчириб қўйганди. Ўшанда миллий мудофаа вазирлиги бу ҳаракат “Кореялараро муносабатларда ишончни тиклаш ва тинчликни таъминлашини” айтганди.
Олдинроқ шимолий кореялик эркак 3 июль куни чегарани кесиб, Жанубий Кореяга қочиб ўтгани ҳақида хабар берилганди. Жанубий Корея ҳарбийлари уни чегаранинг марказий-ғарбий қисми яқинида таъқиб қилган. Шундан сўнг эркак ҳудуддан хавфсиз ўтиши учун унга кўрсатмалар берилган. Кейин эса у ҳибсга олинганди.
Изоҳ (0)