Шимолий кореялик эркак 3 июль куни дунёдаги энг хавфли чегаралардан бирини кесиб, Жанубий Кореяга қочиб ўтди. Бу ҳақда Fox News хабар берди.
Қуролсиз бўлган номаълум эркак кучли қуролланган демилитаризация зонасини кесиб ўтган. Жанубий Корея ҳарбийлари уни чегаранинг марказий-ғарбий қисми яқинида таъқиб қилган. Шундан сўнг эркак ҳудуддан хавфсиз ўтиши учун унга кўрсатмалар берилган. Кейин эса у ҳибсга олинган.
Таъкидланишича, эркак қочишга уринаётгани ёки йўқлиги маълум эмас. Бу ҳақда БМТ қўмондонлиги хабардор қилинган. Шимолий Корея томонида ноодатий ҳаракат кузатилмаган. Ушбу ҳодиса Жанубий Кореянинг Шимол борасидаги стратегияси танқидга учраётган бир пайтда содир бўлмоқда.
Жанубий Кореянинг либерал президенти Ли Чже Мён 11 июнь куни лавозимга киришганидан бери Пхеньян билан зиддиятларни юмшатиш чораларини кўрмоқда. У Шимолга хабар берадиган радиокарнай трансляциясини тўхтатган. Шунингдек, демократияни қўллаб-қувватловчи ҳаво шарлари учирилиши тақиқланган. Танқидчиларнинг огоҳлантиришича, Сеулнинг позицияси Ким Чен Ин режими томонидан нотўғри қабул қилиниши мумкин.
Сўнгги ҳафталарда Шимолий Корея жанубга сигарет қолдиқлари ва болалар тагликлари каби чиқиндилар билан тўлдирилган минглаб ҳаво шарларини учирган. Бу ҳақда The Wall Street Journal хабар тарқатган.
Икки Корея мамлакатлари чегарасидаги ҳодисалар ҳам тез-тез учрамоқда. Апрель ойида Шимолий Кореянинг 10 нафар аскари ҳарбий демаркация чизиғини кесиб ўтишга ҳаракат қилган. Бироқ огоҳлантирувчи ўқлардан сўнг улар ортга чекинган. 2024 йили ҳам 3 та шунга ўхшаш ҳодисалар содир бўлган.
Изоҳ (0)