Мадриднинг “Реал” клуби вингери, бразилиялик юлдуз футболчи Родриго Германия Бундеслигасига йўл олиши мумкин. Бу ҳақда испаниялик журналист Эдуардо Инда хабар берди.
Манбага кўра, Германия чемпиони — Мюнхеннинг “Бавария” клуби Родриго трансферини амалга оширмоқчи ва яқин кунларда “Реал”га расмий таклиф юборишга тайёргарлик кўрмоқда.
Аввалроқ футболчига Англиянинг етакчи клублари — “Арсенал”, “Манчестер Сити” ҳамда “Челси” ҳам қизиқиш билдираётгани ҳақида хабарлар тарқалган эди. Шунингдек, Саудия Арабистонининг “Ан-Насср” клуби ҳам Родригони ўз сафига қўшиб олмоқчи эганлиги ҳақида хабарлар тарқалганди.
Айни дамда “Реал Мадрид” ҳужум чизиғида Килиан Мбаппе, Винисиус Жуниор, Эндрик ва Гонсало Гарсия каби футболчилар борлиги ҳисобга олинса, асосий таркибдаги рақобат кучайгани ҳам трансфернинг амалга ошишига сабаб бўлиши мумкин.
Родриго ҳамда “Реал” ўртасидаги шартнома 2028 йил ёзигача амал қилади. Transfermarkt портали унинг қийматини 90 миллион еврога баҳоламоқда. Футболчи ўтган мавсум барча мусобақалар доирасидаги 51 учрашувда майдонга тушиб, 17 гол ҳамда 9 ассист муаллифига айланган.
Изоҳ (0)