Франциянинг “Пари Сен-Жермен” клуби Мадриднинг “Реал” жамоасида тўп сураётган бразилиялик футболчи Родриго Гоэсни ўз сафига қўшиб олишни режалаштирмоқда. Бу ҳақда ESPN Brasil нашри хабар берди.
Манбага кўра, Париж клуби аллақачон 24 ёшли футболчининг вакиллари билан боғланиб, унинг эҳтимолий трансферини муҳокама қилган.
Аввалроқ Родригога Саудия Арабистонининг “Ан-Насср” ҳамда Лондоннинг “Арсенал” клублари ҳам қизиқиш билдиргани ҳақида хабарлар тарқалган эди. Бироқ ҳозирча бу трансфер ҳақида бошқа хабарлар йўқ.
Родриго “қаймоқранглилар” сафини тарк этиши мумкин. Сабаби, у жамоада алмаштириб бўлмас футболчи ҳисобланмайди. Шу боис у кўпроқ ўйин амалиёти тақдим этадиган клубга ўтишни истамоқда. “Реал Мадрид” эса футболчи учун келиб тушадиган таклифларни кўриб чиқишга тайёр.
Маълумот учун, Родриго ўтган мавсумда барча мусобақалар доирасида 51 та ўйинда майдонга тушиб, 14 та гол ва 10 та голли узатмага муаллифлик қилган. Унинг клуб билан тузган шартномаси 2028 йил ёзигача амал қилади. Transfermarkt портали Родригонинг қийматини 90 миллион еврога баҳолаган.
Изоҳ (0)