Филипинлик икки вазн тоифасидаги собиқ жаҳон чемпиони Марлон Тапалес яқин кунларда Японияга йўл олади. Мақсад — собиқ рақиби ва яқин дўсти Наоя Иноуэнинг навбатдаги жанги тайёргарлигида иштирок этиш. Иноуэ бу сафар WBA Interim камари соҳиби, ўзбекистонлик Муроджон Аҳмадалиевга қарши рингга чиқади. Тапалес эса ушбу тайёргарлик жараёнида унга спарринг рақиб сифатида ёрдам беради.
Мен яқин ҳафталарда Японияда машғулот олиб бораман — бу сафар собиқ рақибим ва дўстим Наоя Иноуэга, менинг эски рақибим Муроджон Аҳмадалиевга қарши тайёргарлик кўришда ёрдам бераман. Бу тажриба менга ўзимнинг оптимал спорт формасини тиклашга ва келажакда яна жаҳон чемпионлиги сари йўл олишга замин яратади, — дейди Тапалес.
Маълумот учун, 2023 йил 8 апрель куни Марлон Тапалес Муроджон Аҳмадалиевга қарши супер енгил вазн тоифасида рингга чиқиб, ҳакамларнинг якдил қарорига кўра ғалаба қозонган ва Аҳмадалиевнинг WBA (Супер) ҳамда IBF камарларини қўлга киритган. Шундан кейин Тапалес 2023 йил декабрь ойида Наоя Иноуэга қарши шу вазн тоифасида рингга чиқиб, WBA (Супер) ва IBF камарларини йўқотган. Наоя Иноуэ эса ушбу вазнда WBA, WBC, IBF ва WBO камарларини бирлаштириб, мутлақ жаҳон чемпионига айланган.
Маълумот учун, Иноуэ ва Аҳмадалиев ўртасидаги жанг 14 сентябрь куни Нагоя шаҳридаги “IG Arena” мажмуасида бўлиб ўтади.
Изоҳ (0)