Мадриднинг “Реал” клуби 2025 йилги ёзги трансфер ойнаси давомида бир нечта футболчилари билан хайрлашиши мумкин. Бу ҳақда испан нашри Diario АS хабар бермоқда.
Манбага кўра, клубни тарк этиши мумкин бўлган футболчилар рўйхатига қуйидагилар кирган: Родриго Гоэс, Фран Гарсия, Давид Алаба ва Дани Себальос. Сўнгги пайтларда Родриго ўзига кўпроқ ўйин амалиёти берилмаётганидан норози бўлмоқда. Шу боис бразилиялик вингер клубдан кетишни истамоқда. Ҳозирда унга Англия Премьер Лигасининг “Арсенал” ва “Манчестер Сити” клублари даъвогарлик қилмоқда. Шунингдек, Мадрид гранди ҳимоячилар Фран Гарсия ҳамда Давид Алаба ва ярим ҳимоячи Дани Себальос билан ҳам хайрлашишни истамоқда.
“Қироллик клуби” раҳбарияти ушбу футболчиларнинг келажаги бўйича қарорни Клублар ўртасидаги Жаҳон чемпионати якунлангач қабул қилади. Ҳозирча улар борасида якуний қарорлар чиққани йўқ, аммо уларнинг эҳтимолий кетиши клубнинг трансфер сиёсатида муҳим ўрин тутиши мумкин.
Шунингдек, Лука Модрич ва Лукас Васкеснинг жамоани тарк этиши аниқ бўлиб улгурган. Хорватиялик футболчи фаолиятини “Милан”да давом эттириши кутилаётган бўлса, Қатар ва Саудия Арабистони клублари Васкесни ўз сафига қўшиб олишни истамоқда.
Маълумот учун, ҳозирда “Реал” Клублар ўртасидаги Жаҳон чемпионатида иштирок этмоқда. Мадридликлар чорак финалда “Боруссия Д”га қарши майдонга тушади. Учрашув Ўзбекистон вақти билан 5 июлдан 6 июлга ўтар кечаси 01:00 да бошланади.
Изоҳ (0)