Мадриднинг “Реал” клуби ҳужумчиси Винисиус Жуниор маошини ошириш бўйича музокаралар олиб бормоқда ва бу уни жамоанинг энг кўп маош олувчи футболчисига айлантириши мумкин, деб хабар берди Diario АS.
Бразилиялик футболчининг амалдаги шартномаси 2027 йил ёзигача амал қилади. У Мадридда қолишни истаётганини бир неча бор таъкидлаган, аммо ҳали янги келишув бўйича аниқ тўхтамга келинмаган. Футболчи “Реал”нинг дастлабки таклифини рад этган, сабаби Винисиус йилига солиқлардан ташқари 20 миллион евро маош олишни истамоқда. Ҳозирда футболчи солиқларсиз клубда 15 миллион евро маош олади.
“Дарё” “Реал” футболчилари қанча маош олиши ҳақида сўз юритади.
Дарвозабонлар
Ҳозирда “Реал”да фақат иккита дарвозабон бор: Тибо Куртуа ва Андрий Лунин. Сиз аллақачон қайси футболчи кўпроқ маош олишини тахмин қилган бўлишингиз мумкин, аммо белгиялик кипер украиналик ҳамкасбидан икки баравар кўпроқ маош олиши ҳаёлингизга келмагани аниқ.
| Футболчилар | Маоши |
|---|---|
| Тибо Куруа | 15 млн евро |
| Андрий Лунин | 4,5 млн евро |
Ҳимоячилар
“Реал” клуби таркибида энг катта маош олувчи ҳимоячи Давид Алаба бўлиб, у ойига 22,5 миллион евро ишлаб топади.
Антонио Рюдигер ва Эдер Милитао бир хил маош олади. Бундан ташқари Ферлан Менди ва клубнинг узоқ йиллик вакили, академия тарбияланувчиси Дани Карвахалнинг маош миқдори тенг.
| Футболчилар | Маоши |
| Давид Алаба | 22,5 млн евро |
| Антонио Рюдигер | 14,5 млн евро |
| Эдер Милитао | 14,5 млн евро |
| Дани Карвахаль | 10,4 млн евро |
| Ферлан Менди | 10,4 млн евро |
| Лукас Вазкес | 9,3 млн евро |
| Фран Гарсия | 5,2 млн евро |
| Хесус Вальехо | 1,8 млн евро |
Ярим ҳимоячилар
Жуд Беллингем “Реал”даги энг кўп маош олувчи ярим ҳимоячи ҳисобланади. Феде Вальверде эса кейинги ўринда туради.
Шунингдек, францияликлар Орелиан Чуамени ва Эдуардо Камавинга ҳам йилига 12 миллион евродан ортиқ маош олмоқда.
Клуб афсонаси Лука Модрич эса ҳали ҳам юқори маошга лойиқ эканини исботлашда давом этмоқда. У жамоада захирадан майдонга тушаётган бўлса-да, ишончли ўйини туфайли ҳали ҳам 10 миллион евродан ортиқ маош олмоқда.
Мадридликларнинг энг кам маош олувчи ярим ҳимоячиси эса Арда Гюлер. 19 ёшли турк футболчиси “Реал”даги иккинчи мавсумини ўтказмоқда ва ҳозирча клубнинг энг кам даромад қилувчи ярим ҳимоячиси саналади.
| Футболчилар | Маоши |
| Жуд Беллингем | €20,8 млн евро |
| Феде Вальверде | €16,6 млн евро |
| Орелиан Чуамени | €12,5 млн евро |
| Эдуардо Камавинга | €12,5 млн евро |
| Лука Модрич | €10,4 млн евро |
| Дани Себаллёс | €10,4 млн евро |
| Арда Гулер | €5,2 млн евро |
Ҳужумчилар
Бу борада ҳеч қандай шубҳа йўқ — Килиан Мбаппе “Реал”нинг энг кўп маош олувчи ҳужумчиси. У клубдаги йилига 30 миллион евродан кўпроқ маош оладиган ягона футболчи ҳисобланади.
Иккинчи ўринда Винисиус Жуниор, ундан кейин эса Родриго жой олган. Айрим мухлислар Родригога бундан ҳам катта маош берилиши керак деб ҳисоблайди.
Шунингдек, Браим Диас ҳам ҳозирда 7 миллион евродан ортиқ ишлаб топмоқда, лекин кўпчилик унинг ҳам маоши оширилиши кераклиги ҳақида айтилади.
Клубнинг энг кам маош олувчи ҳужумчиси эса Эндрик. У ўтган ёзда Бразилиянинг “Палмейрас” клубидан келиб қўшилган ва ҳозирча жамоанинг энг кам даромад қилувчи ҳужумчиси бўлиб турибди.
| Футболчилар | Маоши |
|---|---|
| Килиан Мбаппе | 31,2 млн евро |
| Винисиус Жр | 20,8 млн евро |
| Родриго | 12,5 млн евро |
| Браим Диас | 7,2 млн евро |
| Эндрик | 4,1 млн евро |
“Реал”нинг энг кўп маош олувчи 5 футболчиси
Мадриднинг “Реал” клубида энг кўп маош олувчи футболчи Килиан Мбаппе бўлиб, у йилига 30 миллион евродан ортиқ ишлаб топади. У клубдаги энг катта маош олувчи футболчи бўлиш билан бирга, ушбу кўрсаткич бўйича рақибларидан ҳам анча илгарилаб кетган.
Иккинчи ўриндан Давид Алаба жой олган. Унинг маоши Жуд Беллингем ва Винисиус Жуниорникидан ҳам юқори. Лекин ушбу уч футболчи ҳам йилига 20 миллион евродан ортиқ ишлаб топмоқда.
Топ-5 рўйхатини эса Феде Вальверде якунлайди. У келажакда “Реал” сардорига айланиши мумкин ва ҳозирда жамоанинг энг юқори маош олувчи футболчиларидан бири ҳисобланади.
| Футболч | Маоши |
|---|---|
| Килиан Мбаппе | 31,2 млн евро |
| Давид Алаба | 22,5 млн евро |
| Жуд Беллингем | 20,8 млн евро |
| Винисиус Жуниор | 20,8 млн евро |
| Феде Вальверде | 16,6 млн евро |
Маълумот учун ушбу маош суммаси солиқлар билан қўшиб ҳисобланган. Агар солиқлардан ташқари ҳисобланса, рақам кўрсаткичларида пасайиш бўлади.
Изоҳ (0)