Madridning “Real” klubi vingeri, braziliyalik yulduz futbolchi Rodrigo Germaniya Bundesligasiga yo‘l olishi mumkin. Bu haqda ispaniyalik jurnalist Eduardo Inda xabar berdi.
Manbaga ko‘ra, Germaniya chempioni — Myunxenning “Bavariya” klubi Rodrigo transferini amalga oshirmoqchi va yaqin kunlarda “Real”ga rasmiy taklif yuborishga tayyorgarlik ko‘rmoqda.
Avvalroq futbolchiga Angliyaning yetakchi klublari — “Arsenal”, “Manchester Siti” hamda “Chelsi” ham qiziqish bildirayotgani haqida xabarlar tarqalgan edi. Shuningdek, Saudiya Arabistonining “An-Nassr” klubi ham Rodrigoni o‘z safiga qo‘shib olmoqchi eganligi haqida xabarlar tarqalgandi.
Ayni damda “Real Madrid” hujum chizig‘ida Kilian Mbappe, Vinisius Junior, Endrik va Gonsalo Garsiya kabi futbolchilar borligi hisobga olinsa, asosiy tarkibdagi raqobat kuchaygani ham transferning amalga oshishiga sabab bo‘lishi mumkin.
Rodrigo hamda “Real” o‘rtasidagi shartnoma 2028-yil yozigacha amal qiladi. Transfermarkt portali uning qiymatini 90 million yevroga baholamoqda. Futbolchi o‘tgan mavsum barcha musobaqalar doirasidagi 51 uchrashuvda maydonga tushib, 17 gol hamda 9 assist muallifiga aylangan.
Izoh (0)