Кен Кизининг шу номли машҳур романига асосланган “Какку уяси узра парвоз” фильми учун янги сериал суратга олинади. Сериалда бош қаҳрамонлардан бири — Жаноб Бромден (Вожд) ҳақида ҳикоя қилинади. Бу ҳақда кино оламига оид CK Café подкастида продюсер Пол Зенц маълум қилди.
“Марҳум Кен Кизининг рафиқаси билан сериал суратга олиш бўйича шартнома имзоладим. Унда биз воқеаларни Вожд нуқтайи назаридан кўрсатамиз. Биринчи мавсумда унинг руҳий касаллар шифохонасидан қочганидан кейинги ҳаёти акс эттирилади”, деди Зенц.
Маълумот учун, ёзувчи Кизи 1975 йилда Милош Форман томонидан суратга олинган фильмни қаттиқ танқид қилган эди, чунки фильм асл роман мазмунидан четга чиққан ва ундаги воқеалар Бромденнинг нигоҳи билан баён этилган.
Барча қўзғолончиларнинг озодлик мадҳиясига айланган экранизацияда бош рол Рендл Патрик МакMёрфига (Жек Николсон ижросида) берилган. Ҳозирча янги сериалнинг сценарий муаллифи ким бўлиши ва лойиҳани қайси студия ишлаб чиқариши номаълум.
Драма сюжетига кўра, бош қаҳрамон тиббий кўрикдан ўтиши учун қамоқхонадан руҳий касаллар шифохонасига кўчирилади. У ерда у бошқа беморларнинг ҳаётини ўзгартиришга ҳаракат қилади ҳамда шафқатсиз катта ҳамширага қарши курашиш учун барчага илҳом беради. Бромден — ўзини кар ва соқов қилиб кўрсатадиган бемор. Бироқ янги келган беморнинг ҳаракатлари таъсирида у аста-секин бу ниқобни ечади.
Айни пайтгача экранлаштирилган ягона расмий телевизион спин-офф бу 2020 йилда Netflix платформасида намойиш этилган “Ретчед” сериалидир. Амми лойиҳа биринчи мавсум чиққанидан кейин бекор қилинган. Унинг продюсери ҳам Сол Зенц бўлган.
Изоҳ (0)