Машҳурлиги ва маҳоратига қарамай, айрим актёрлар салбий образни ишонарли тарзда гавдалантира олмайди. Томошабинлар уларни бундай ролда қабул қилмайди, бунинг сабаблари турлича бўлиши мумкин — ташқи кўринишнинг образга тўғри келмаслиги, доимий ижобий ролларда кўриниб келгани ёки ролга чуқур киришдаги муаммолар. Қуйида ана шундай ҳолатга дуч келган тўрт актёр ҳақида сўз юритамиз.
Жаред Лето — “Худкушлар гуруҳи” фильмидаги Жокер
Агар кино ихлосмандлари илгари Ҳит Леджер ва Хоакин Феникснинг Жокер образларини кўрмаганида эди, Жаред Летонинг ижроси бунчалик салбий қабул қилинмасди. Дастлаб у бу ролга тасдиқланганда мухлислар катта умид қилган эди. Кўпчилик Летонинг Жокери жуда ёрқин чиқишини тахмин қилди, аммо натижа кутилганидек бўлмади.
Танқидчиларнинг фикрича, ҳар бир актёр Жокерга ўзига хосликни олиб кирган ва уни кўп қиррали қилган. Лекин Жаред буни уддалай олмади. Бундан ташқари, актёр суратга олиш майдончасида ҳам салбий таассурот қолдирди. Оммавий ахборот воситалари унинг кадр ортидаги қилиқлари — гоҳ Лето ўйин-кулги уюштириши, гоҳ ҳамкасбларини мазах қилиши ҳақида ёзишди. Улар Жаред ўз ишига ҳурматсизлик ва масъулиятсизлик билан қарайди, деб ҳисоблашди. Бундан ташқари, у бу қиёфада даҳшатли кўринишнинг уддасидан чиқолмади.
Томошабинлар уни “ақлдан озган Жокер” сифатида қабул қила олмади. Ҳит Леджер ва Хоакин Феникс эса аксинча, бундай образда чуқур психологик драматизм яратган эди.
Светлана Ходченкова — “Ўлмас Росомаха” фильмидаги Сувилон
Светлана Ходченкова Голливудга илк қадамларини қўяётган пайтда “Ўлмас Росомаха” фильмида Сувилон образини ижро этган. Унга фильмда кўп вақт ажратилмаган бўлса-да, бу қисқа дақиқаларда актриса образи ёдда қоларли чиққан.
Аммо унинг образи фильмда хавфли душман эмас, балки жозибали аёлдек кўринади. Томошабин Росомахага жиддий таҳдид сезмайди. Ходченкованинг чиройли турмаги, мовий кўзлари ва нафис қиёфаси уни қаҳри қаттиқ, қонхўр душман сифатида кўришга халақит беради. Бунгача актриса ҳеч қачон салбий образларни ижро этмаган, бу эса томошабинлар унга ишонишига янада тўсқинлик қилган бўлиши мумкин.
Том Хиддлстон — Marvel фильмларидаги Локи
Marvel фильмларида Том Хиддлстон ижросидаги Локи образи шу қадар машҳур бўлдики, у ҳатто Капитан Америкадан ҳам кўпроқ мухлис тўплади. Бу эса одатда ёвуз қаҳрамонларга хос ҳолат эмас. Комиксларда Локи маккор, ўз манфаати учун ҳар қандай ишга тайёр хоин сифатида тасвирланади.
Хиддлстон Локи ролида илк бор 2011 йилда “Тор” фильмида пайдо бўлган. Унда Локи оиласини сотади, Йотунхаймни йўқ қилишга ва Ерга ҳукмронлик қилишга ҳаракат қилади. Лекин шунга қарамай, томошабинлар унга ачиниш ва ҳамдардлик билан қарайди.
Том Хиддлстон илгари бундай салбий ролларда ўйнамаган ва ҳар сафар Локи хиёнат қилганида ҳам томошабинлар уни тушунишга ҳаракат қилган. Мухлисларининг илиқ муносабати сабаб Локи аста-секин ижобий қаҳрамонга айлана бошлади. Marvel эса сюжетни ўзгартиришга мажбур бўлди. Натижада Локи алоҳида сериалда бош қаҳрамон сифатида чиқди.
Адам Драйвер — “Юлдузлар жанги”
“Юлдузлар жанги: куч уйғониши” фильмида Адам Драйвер Кайло Рен ролини ижро этди. Танқидчилар унинг актёрлик маҳоратидан мамнун бўлса-да, томошабинлар уни муваффақиятсиз деб баҳолади. Бу сафар ҳам уларнинг норозилиги жиддий асосга эга эмасди. Кўпчиликка Адамнинг ташқи кўриниши ва хатти-ҳаракатлари ёқмади. Томошабинларнинг фикрича, Драйвер актёрдан шафқатсизлик ва ўзига хос таассурот талаб қиладиган ёвуз инсон ролига ҳали “етиб бормаган эди”. Кимгадир у етарлича келишган эмас, кимгадир эса ҳаддан ортиқ ёқимтой йигит бўлиб кўринди.
Изоҳ (0)