Ўзбекистонда сентябрдан сертификатсиз чет тили ўқитувчилари ишдан бўшатилиши мумкин

Мамлакатда 2025/26-ўқув йилидан чет тилидан дарс берадиган ўқитувчиларда камида B2 даражадаги миллий ёки халқаро сертификат бўлиши шарт. Бу талаб ҳукуматнинг 2021 йил 19 майдаги қарорида белгиланган.

Қарорда ёзилишича, талаб барча умумий ўрта, ўрта махсус ва профессионал таълим муассасалари учун амал қилади. Бунда фақатгина инглиз тили эмас, балки барча хорижий тиллар қамраб олинади (2-хорижий тил устозлари мустасно).

Қарорга биноан мазкур тартиб 2024 йилдан жорий этилиши керак эди. Лекин педагоглар ва жамоатчилик вакиллари мурожаатлари сабабли қарор ижроси бир йилга узайтирилган.

Мактабгача ва мактаб таълими вазирлиги янги талаб ҳақида педагогларга бир неча марта расмий эслатмалар берган. Ҳудудларда тушунтириш ишлари ҳам олиб борилган.

“Дарё” масала юзасидан вазирлик ахборот хизмати билан боғланиб, сертификатсиз чет тили ўқитувчилари сони қанчалигини сўради.

“Ҳозир рақамлар таҳлил қилиниб, ўрганиб чиқиляпти. Июль–август ойларида кўп ўқитувчилар тил сертификати олиш учун аризалар топширган, жавоблар сентябрга яқин чиқади”, дея маълум қилди вазирликдаги манба.

Янги ўқув йилидан бошлаб камида B2 сертификати бўлмаган чет тили ўқитувчиси билан меҳнат шартномаси бекор қилиниши мумкин. Сертификат талаби қўйилиши сифатли таълимга эришиш экани бир неча бор айтилган. Хорижий тилда дарс берувчи ўқитувчи чет тилини энг камида B2, яъни олий таълимни битирганда бакалаврга қўйилган даражада билиши кераклиги назарда тутилмоқда.

Ўз навбатида қарорда 2022/23-ўқув йилидан бошлаб, давлат таълим муассасаларига янги ишга кирган чет тили ўқитувчилари камида B2 даражадаги миллий ёки халқаро сертификатга эга бўлиши кераклиги белгиланган. 2022/23-ўқув йилигача давлат олий таълим муассасаларида ишлаётган барча чет тили ўқитувчилари камида C1 даражадаги миллий ёки халқаро сертификат олиши лозимлиги кўрсатилган.

Маълумотларга кўра, 2024 йилда республикадаги мактабларда B2 ва ундан юқори даражадаги сертификатга эга хорижий тил ўқитувчилари сони 29 001 нафар бўлган. Тил билиш сертификатига эга мактаб ўқувчилари умумий сони эса 37 074 нафарни ташкил этган.