Air India авиакомпаниясига тегишли Boeing 787-8 Dreamliner самолёти учиб кўтарилгандан сўнг двигателларга ёқилғи узатилиши тўхтатилиши оқибатида ҳалокатга учраган. Бу ҳақда Ҳиндистон авиация ҳалокатларини текшириш бюросининг дастлабки тергов ҳисоботида маълум қилинди.
Ҳисоботга кўра, самолёт учиб кўтарилганидан сўнг двигателларга ёқилғи узатилиши тўхтаган, бу эса учувчилар кабинасида чалкашликка сабаб бўлган. Таъкидланишича, самолёт максимал тезликка эришгач, 1 ва 2-двигателларга ёқилғи узатилиши тўхтаган.
“Кабинадаги суҳбатлар ёзувида учувчилардан бири иккинчисидан нима учун ўчириб қўйганини сўраётгани эшитилади. Иккинчи учувчи эса бундай қилмаганини айтган”, дея қайд этилган ҳисоботда.
Юзага келган чалкашликдан бир неча дақиқа ўтгач, самолёт қулаб тушган.
Шу билан бирга, мутахассислар учувчилар двигателлардан бирини ишга тушира олганини аниқлашган. Аммо бу лайнер тезлигининг кескин пасайишини тўхтатишга ёрдам бермаган. Шунингдек, ҳисоботда айтилишича, Boeing парвози ҳудудида двигателга кириб, ҳалокатга сабаб бўлиши мумкин бўлган қушлар кузатилмаган.
Ҳиндистондан Буюк Британияга йўл олган Boeing 787 Dreamliner йўловчи самолёти 12 июнь куни Аҳмадобод шаҳри яқинида учиб кўтарилганидан бир неча дақиқа ўтиб ҳалокатга учраган. Лайнер шифокорлар ётоқхонасига қулаб тушган. Парвозни амалга оширган Air India авиакомпанияси маълумотларига кўра, самолёт бортида 242 киши бўлган.
Фақат битта йўловчи омон қолган. Кейинчалик эркакнинг айтишича, самолёт ҳавога кўтарилганидан сўнг “гўё ҳавода тўхтаб қолгандек бўлган”, сўнгра тиббиёт коллежи ётоқхонасига қулаб тушган. Сўнгги маълумотларга кўра, қутқарувчилар томонидан топилган авиаҳалокат қурбонларининг умумий сони 275 кишини ташкил этди.
Изоҳ (0)