Netflixʼнинг машҳур сериали “Калмар ўйини”нинг якуний учинчи мавсуми катта шов-шув билан тақдим этилди. Премьерадан сўнг атиги уч кун ичида янги фасл 60,1 миллион марта томоша қилинди. Бу кўрсаткич уни қисқа муддат ичида энг кўп кўрилган сериалга айлантирди. Ушбу маълумотни Netflix ўзининг янгиланган топ-10 рейтингида эълон қилди.
Шу тариқа, “Калмар ўйини” Netflix тарихидаги энг машҳур инглиз тилида бўлмаган шоулар орасида тўққизинчи ўринни эгаллади. Сериалнинг иккинчи мавсуми ҳам ўз вақтида юқори натижаларга эришган — премерадан кейинги дастлабки тўрт кун ичида 68 миллион марта кўрилган ва илк ҳафтасидаёқ рейтингда биринчи ўринга чиққан. Бу натижа ҳатто илгари етакчилик қилган “Уэнздей” сериалидан (50,1 миллион кўриш) ҳам юқори бўлган эди.
Маълумот учун, Netflix ҳафталик рейтингни душанбадан якшанбагача тузади. Иккинчи фаслга тўрт кунлик кўришлар кирган бўлса, учинчи фаслда бу муддат уч кун билан чекланган. Шунга қарамай, сериалнинг янги фасли жуда муваффақиятли бошланган.
Учинчи фасл сюжети бош қаҳрамон Сон Ги Хун атрофида давом этади. У яна шафқатсиз ўйинга аралашишга мажбур бўлади. Бироқ бу сафар унинг мақсади фақат тирик қолиш эмас, балки ўйин тизимига қарши курашиш, қоидаларни ўзгартириш ва инсонийлик ҳали йўқолмаганини исботлашдир.
Изоҳ (0)