Сўнгги йилларда Ўзбекистоннинг ташқи сиёсатда кузатилаётган фаол, очиқ, прагматик ва амалий натижалари мамлакатни Марказий Осиёда хорижий инвесторлар учун жозибадор давлатга айлантирди.
Юртимизда амалга оширилаётган кенг кўламли ислоҳотлар, халқаро майдондаги фаол ва самарали дипломатик саъй-ҳаракатлар натижасида 2024 йилда Ўзбекистон тўғридан-тўғри хорижий инвестисияларни жалб қилиш бўйича Марказий Осиёда етакчиликка эришди.
БМТнинг Савдо ва тараққиёт бўйича конференцияси (UNCTAD) сўнгги ҳисоботига кўра, 2024 йилда Ўзбекистон иқтисодиётига кириб келган тўғридан-тўғри хорижий инвестисиялар ҳажми 2,8 миллиард АҚШ долларини ташкил этди. Ушбу натижа сўнгги ўн йилликларда минтақада доимий равишда етакчиликни сақлаб келаётган Қозоғистонни ортда қолдирганимизни кўрсатади.
Қозоғистон 1992 йилдан бери илк марта бу кўрсаткич бўйича манфий натижа қайд этиб, минус 2,55 миллиард АҚШ доллари билан минтақавий рўйхатда охирги ўринни эгаллади. Туркманистон 1,6 миллиард доллар жалб қилиб иккинчи ўрин, Қирғизистон эса 705 миллион доллар билан учинчи ўриндан жой олди. Тожикистон эса 291 миллион доллар инвестисия жалб этишга муваффақ бўлди.
Мутахассислар фикрича, Ўзбекистонда инвестисия фаоллиги барқарор ўсишда давом этмоқда. Биргина рақамли иқтисодиёт соҳасига 2024 йилда 900 миллион АҚШ долларига яқин инвестисия жалб этилди.
Шунингдек, транспорт инфратузилмасини ривожлантириш мақсадида 1 миллиард доллардан ортиқ хорижий сармоя киритилди.
Хорижий инвестисияларни жалб этиш ва уларни самарали бошқариш Ўзбекистон иқтисодий тараққиётининг асосий драйверларидан бири бўлиб қолмоқда. 2020–2024 йиллар оралиғида юртимиз иқтисодиётида 40 дан ортиқ энергетика лойиҳалари учун 18 миллиард доллар миқдорида хорижий инвестисия жалб қилинди. Бу кўрсаткич Марказий Осиёда рекорд натижа сифатида баҳоланмоқда.
Албатта, ушбу ютуқлар ўз-ўзидан амалга ошгани йўқ. Бунда Президент Шавкат Мирзиёевнинг халқаро майдондаги сиёсий етуклиги ва донолиги, дунё давлатлари билан мустаҳкам ва ўзаро манфаатли алоқалар ўрнатишдаги фаол ҳаракатлари катта аҳамият касб этади. Айни пайтда давлатимиз раҳбари Озарбайжонда бўлиб ўтаётган Иқтисодий ҳамкорлик ташкилоти саммитида қатнашиб, мамлакатимиз нуфузини янада ошириб, янги сармоя ва ҳамкорликлар учун йўл очмоқда. Бундай йирик халқаро тадбирларда фаол иштирок, шубҳасиз, Ўзбекистоннинг келгусида янада кўпроқ хорижий инвестисияларни жалб қилишига замин яратади.
Изоҳ (0)