Уммонда хорижлик билан шаръий никоҳ асосида яшаган ва уйда тутқунликда сақланган ўзбекистонлик аёл ва унинг фарзандлари ватанга қайтарилди, деб хабар бермоқда “Дунё” ахборот агентлиги.
Ўзбекистон элчихонаси маълумотига кўра, ушбу давлатда оғир ҳаётий вазиятга тушиб қолган аёл И.С. мурожаат қилиб, икки нафар вояга етмаган фарзанди билан Ўзбекистонга қайтишида ёрдам сўраган.
Мурожаатда қайд этилишича, у 2019 йилдан буён Уммоннинг ал-Бурейми шаҳрида, асли келиб чиқиши эронлик бўлган, лекин ҳеч бир давлат фуқаролигига эга бўлмаган, Али исмли шахс билан шаръий никоҳ асосида бирга яшаб келган. Аёл шаръий эридан 2020 йилда ва 2022 йилда фарзандларни дунёга келтирган.
Оила бошлиғининг ҳеч қандай ҳужжатга эга эмаслиги ва қонуний никоҳ шартномасининг йўқлиги сабабли фарзандларга туғилганлик ҳақидаги гувоҳномаларни расмийлаштириш ҳам йиллар давомида ортга сурилиб келган. Шунингдек, оиладаги келишмовчилик, ноқонуний эрнинг фарзандларга нисбатан тез-тез куч ишлатиш ҳолатлари ва уларни ал-Бурейми шаҳридаги хонадонда тутқунликда сақлаш ҳолатлари аёлнинг Ўзбекистон элчихонасига ёрдам сўраб ариза ёзишга ундаган.
Аризада қайд этилган ҳолатлар батафсил ўрганилганидан сўнг, 19 май куни элчихона ходимлари ал-Бурейми шаҳридаги И.С. ушлаб турилган хонадонга борган. Дипломатлар кўмагида она ва унинг икки нафар вояга етмаган болалар Масқат шаҳрига олиб келинган ҳамда вақтинча яшаш учун жой билан таъминланган.
Шундан сўнг, элчихона консуллик бўлими томонидан Уммон тегишли давлат идораларига мурожаатлар қилиниб, И.С.нинг вояга етмаган фарзандларига туғилганлик ҳақидаги ва ватанга қайтиш учун гувоҳномалар расмийлаштирилган. “Ватандошлар” жамоат фонди ва Ўзбекистон Миграция агентлиги ҳамда Масқатдаги фаол ўзбекистонлик шахс кўмагида мазкур оиланинг Ўзбекистонга қайтиши учун авиачипталар харид қилинган.
Аёл икки фарзанди билан 18 июнь куни Масқат шаҳридаги халқаро аэропортдан Ўзбекистонга кузатиб қўйилган.
Май ойининг ўрталарида Россияда оилавий зўравонлик қурбони бўлган аёл ва унинг уч нафар фарзанди Ўзбекистонга қайтарилганди. Ҳиндистонда одам савдоси қурбонига айланиш хавфида бўлган аёл Ўзбекистонга олиб келинганди. Апрелда Мьянмада одам савдоси қурбони бўлган икки нафар Ўзбекистон фуқароси ватанга қайтарилганди.
Изоҳ (0)