Покистоннинг шимоли-ғарбида террорчи томонидан амалга оширилган портлаш натижасида камида 16 киши ҳаётдан кўз юмди. Бу ҳақда маҳаллий маъмурият ва хавфсизлик хизмати вакиллари маълумотига асосланиб, Agence France Presse (AFP) хабар бермоқда.
Маълум қилинишича, Шимолий Вазиристонда, Покистон ва Афғонистон чегараси яқинида, номаълум шахс портловчи моддалар билан тўлдирилган автомобилни ҳарбий карвонга уриб юборган. Воқеа оқибатида 16 нафар ҳарбий хизматчи ҳалок бўлган, яна 20 га яқин киши, шу жумладан фуқаролар жароҳатланган.
“Портлаш оқибатида иккита уйнинг томи вайрон бўлди, олти нафар бола жароҳатланди”, дея Покистон полицияси вакили.
Тhе Times of India газетасининг ёзишича, портлаш учун жавобгарликни Покистон “Толибон” ташкилотига мансуб дала қўмондони Ҳафиз Гул Баҳодир гуруҳи ўз зиммасига олган.
Покистон ҳукумати бир неча йил олдин Афғонистонда ҳокимиятга келган “Толибон”ни чегара ҳудудларида ҳарбийлар ва ҳуқуқ-тартибот идоралари ходимларига қилинган ҳужумларга кўмаклашганликда айблаяпти. “Толибон” бу айбловларни рад этмоқда.
Март ойида Банну шаҳрида (Хайбер-Пахтунхва вилояти) террорчилар портловчи моддалар билан тўлдирилган иккита автомобилни ҳарбий базага киритишган. Базадан ташқари, яқин атрофдаги масжид ва турар-жой биноси ҳам жиддий зарар кўрган. Ҳужум оқибатида камида 13 нафар тинч аҳоли вакили, жумладан олти нафар бола ва беш нафар аскар ҳалок бўлган. Яна 36 киши жароҳатланганлар. 16 нафар жангари, улар орасида тўрт нафар ўзини портлатувчи ҳам бор, йўқ қилинган. “Покистон душманларининг ёвуз ниятлари ҳеч қачон амалга ошмайди”, деган эди ўшанда мамлакат бош вазири Шаҳбоз Шариф.
AFP маълумотларига кўра, 2025 йил бошидан буён Покистоннинг Афғонистон билан чегарадош ҳудудларида ҳукуматга қарши курашни мақсад қилган гуруҳларнинг ҳужумлари натижасида 290 га яқин киши, асосан хавфсизлик кучлари ходимлари ҳалок бўлган.
Изоҳ (0)