Pokistonning shimoli-g‘arbida terrorchi tomonidan amalga oshirilgan portlash natijasida kamida 16 kishi hayotdan ko‘z yumdi. Bu haqda mahalliy ma’muriyat va xavfsizlik xizmati vakillari ma’lumotiga asoslanib, Agence France Presse (AFP) xabar bermoqda.
Ma’lum qilinishicha, Shimoliy Vaziristonda, Pokiston va Afg‘oniston chegarasi yaqinida, noma’lum shaxs portlovchi moddalar bilan to‘ldirilgan avtomobilni harbiy karvonga urib yuborgan. Voqea oqibatida 16 nafar harbiy xizmatchi halok bo‘lgan, yana 20 ga yaqin kishi, shu jumladan fuqarolar jarohatlangan.
“Portlash oqibatida ikkita uyning tomi vayron bo‘ldi, olti nafar bola jarohatlandi”, deya Pokiston politsiyasi vakili.
The Times of India gazetasining yozishicha, portlash uchun javobgarlikni Pokiston “Tolibon” tashkilotiga mansub dala qo‘mondoni Hafiz Gul Bahodir guruhi o‘z zimmasiga olgan.
Pokiston hukumati bir necha yil oldin Afg‘onistonda hokimiyatga kelgan “Tolibon”ni chegara hududlarida harbiylar va huquq-tartibot idoralari xodimlariga qilingan hujumlarga ko‘maklashganlikda ayblayapti. “Tolibon” bu ayblovlarni rad etmoqda.
Mart oyida Bannu shahrida (Xayber-Paxtunxva viloyati) terrorchilar portlovchi moddalar bilan to‘ldirilgan ikkita avtomobilni harbiy bazaga kiritishgan. Bazadan tashqari, yaqin atrofdagi masjid va turar-joy binosi ham jiddiy zarar ko‘rgan. Hujum oqibatida kamida 13 nafar tinch aholi vakili, jumladan olti nafar bola va besh nafar askar halok bo‘lgan. Yana 36 kishi jarohatlanganlar. 16 nafar jangari, ular orasida to‘rt nafar o‘zini portlatuvchi ham bor, yo‘q qilingan. “Pokiston dushmanlarining yovuz niyatlari hech qachon amalga oshmaydi”, degan edi o‘shanda mamlakat bosh vaziri Shahboz Sharif.
AFP ma’lumotlariga ko‘ra, 2025-yil boshidan buyon Pokistonning Afg‘oniston bilan chegaradosh hududlarida hukumatga qarshi kurashni maqsad qilgan guruhlarning hujumlari natijasida 290 ga yaqin kishi, asosan xavfsizlik kuchlari xodimlari halok bo‘lgan.
Izoh (0)