Покистоннинг Лаҳор шаҳрида Ўзбекистон савдо уйи очилди. Бу ҳақда Савдо-саноат палатаси матбуот хизмати хабар берди.
Қайд этилишича, ушбу савдо уйи икки мамлакат тадбиркорлари ўртасидаги тўғридан-тўғри савдо ва ҳамкорликни янада фаоллаштиришга хизмат қилади. Унда Ўзбекистондан келтирилган қуруқ мевалар, тери, ип-калава, дори-дармон ва тиббиёт буюмлари, кимё ва бошқа маҳсулотлар намойиш этилади.
25 июнь куни Карачи шаҳрида Ўзбекистон ва Покистон ишбилармонлари ўртасида бизнес-форум ўтказиш режалаштирилган. Аввалги бизнес-форум Тошкентда февраль ойи охирларида бўлиб ўтганди. Ўшанда томонлар Ўзбекистон ва Покистонда бизнес вакилларини кенг жалб қилган ҳолда ишбилармонлик тадбирларини мунтазам — йилига камида икки марта ўтказиб боришга келишганди.
Ўзбекистон—Покистон иқтисодий ҳамкорлиги
Икки давлат иқтисодий ҳамкорлиги янги лойиҳалар билан бойимоқда. Pak Merit, Diamond Group, Silk-way, Getz Pharm, Gerbion, NLS ва бошқа компаниялар билан лойиҳалар амалга оширилмоқда. Транспорт ва логистика имкониятлари кенгаймоқда. Сўнгги йилларда мамлакатлар ўртасида юк ташиш ҳажми 5 баробар ошди. Ушбу соҳадаги ҳамкорликни кенгайтириш мақсадида қўшма транспорт-логистика компаниясини ташкил этиш режалаштирилган.
Тошкентда ҳам Покистон савдо уйи бор. Бу савдо уйи икки давлат ўртасидаги савдо-иқтисодий алоқаларни мустаҳкамлаш мақсадида ташкил этилган.
Изоҳ (0)