Ҳиндистон ички ишлар вазири Амит Шоҳ 21 июнь куни Покистон билан “Ҳинд сув шартномаси ҳеч қачон тикланмаслигини” маълум қилди. Бу ҳақда Anadolu хабар берди.
“Халқаро шартномаларни бир томонлама бекор қилиш мумкин эмас, лекин биз уни бекор қилишга ҳақли эдик. Шартнома муқаддимасида бу икки мамлакат тинчлиги ва тараққиёти учун бўлгани айтилган. Бироқ бу шартлар бузилди”, деди Амит Шоҳ.
22 апрель куни бошланган Ҳиндистон—Покистон ўртасидаги Паҳалгам воқеасидан сўнг, ҳиндлар сув шартномасини бир томонлама тўхтатган эди. У 1960 йилда Жаҳон банки воситачилигида икки қўшни ўртасида оқадиган дарёлардан фойдаланишни тартибга солиш мақсадида тузилган эди.
Ҳиндистон томон “қонуний равишда унга тегишли бўлган сувдан фойдаланишини ва канал қуриш орқали Покистонга оқаётган сувни Рожастонга олиб кетишини” қўшимча қилган.
Покистон Ташқи ишлар вазирлиги расмий вакили Шафқат Али Хон Ҳиндистоннинг қарорига бу “халқаро шартномалар муқаддаслигини сурбетларча менсимасликни акс эттиради”, деб жавоб қайтарган. У Ҳиндистоннинг шартномани тўхтатиши “халқаро ҳуқуқ, шартнома қоидалари ва давлатлараро муносабатларни тартибга солувчи асосий тамойилларнинг аниқ бузилиши” эканини қўшимча қилган.
Покистон шартномага қатъий содиқ қолиши ва у бўйича ўзининг қонуний ҳуқуқларини ҳимоя қилиш учун барча зарур чораларни кўришини маълум қилган. Шунингдек, мамлакат Нью Деҳлини “бир томонлама ва ноқонуний позициясини зудлик билан бекор қилишга ҳамда ъҲинд суви шартномасиниъ тўлиқ ва тўсиқсиз амалга ошириш”га чақирган.
Ҳиндистон Покистонга оқиб ўтадиган учта дарёнинг “ортиқча суви”ни ўзининг Панжоб, Харяна ва Ражастхан штатларига йўналтирмоқчи экани ҳақида маълумот берилган эди. Бунинг учун 113 километр узунликдаги канал қуриш бўйича техник-иқтисодий асослаш ишлари олиб борилмоқда.
Лойиҳада “ортиқча сув”ни чиқариб юбориш учун янги каналлар қуриш кўзда тутилган. Ҳинд дарёси сувларини уч йил давомида каналлар орқали Ражастхан штатининг Ганганагар шаҳрига йўналтириш ҳақида 14 июнь куни ички ишлар вазири Амит Шоҳ маълум қилганди. У Покистон “ҳар бир томчи сувга ташна бўлишини” қўшимча қилган.
Изоҳ (0)