Президент Шавкат Мирзиёев ва Покистон бош вазири Шаҳбоз Шариф 7 июнь куни бўлиб ўтган телефон орқали мулоқотда бутун мусулмон уммати учун муқаддас Қурбон ҳайити — Ийд ал-Адҳо муносабати билан бир-бирини самимий табриклади. Бу ҳақда Президент матбуот хизмати хабар берди.
Етакчилар дўст Ўзбекистон ва Покистон халқларига фаровонлик ва равнақ тилади.
Покистон бош вазирининг жорий йил февраль ойида Ўзбекистонга тарихий ташрифи давомида эришилган келишувларни амалга ошириш натижалари муҳокама қилинди.
Стратегик шериклик изчил мустаҳкамланиб бораётгани, турли даражалардаги мулоқот ва алмашинувлар фаоллашгани мамнуният билан қайд этилди.
Ўзаро савдо ва юк ташишлар ҳажми сезиларли ортмоқда, тўғридан тўғри авиақатновлар кўпаймоқда. Фармацевтика, қишлоқ хўжалиги, тўқимачилик, логистика ва бошқа йўналишларда лойиҳалар амалга оширилмоқда. Лаҳор ва Карачида савдо уйлари ташкил этилган.
2025 йилга режалаштирилган Ҳукуматлараро комиссиянинг навбатдаги йиғилиши ва бизнес форумини самарали ўтказиш муҳимлиги қайд этилди.
Ўзбекистон ва Покистон етакчилари минтақавий кун тартиби юзасидан ҳам фикр алмашди, бўлажак тадбирлар режасини кўриб чиқди.
Ўзбекистон—Покистон муносабатлари
Покистон – Ўзбекистон мустақиллигини биринчилардан бўлиб, 1991 йилнинг 20 декабрида тан олган. Ўзаро дипломатик муносабатлар эса 1992 йил 10 майдан бошлаб ўрнатилган. Икки давлат ўртасидаги иқтисодий алоқалар кейинги йилларда янги босқичга кўтарилди.
2019 йилдаги 122 миллион долларлик савдо айланмаси 2023 йилга келиб 387 миллион долларга етди. 2024 йилда товар айирбошлаш ҳажми 400 миллион доллардан ошди, қўшма корхоналар сони 130 тага етди. Карачи ва Тошкентда савдо уйлари очилди. Тошкент ва Лаҳор ўртасида тўғридан тўғри авиақатновлар тикланди.
Фаол сиёсий мулоқотлар, самарали парламентлараро ва идоралараро алмашинувлар давом этмоқда.
Изоҳ (0)