UFC сўнгги йилларда географиясини кенгайтиришда давом этмоқда. Янги мамлакатларда турнирлар ўтказилмоқда, спортчилар сони эса йилдан йилга ортиб бормоқда. Ўтган йили Саудия Арабистони кўмагида ташкил этилган Riyadh Season Noche тадбири кутилганидан ҳам юқори даражада ўтди. Энди эса лига президенти Дана Уайт янги, янада кутилмаган ҳудудни, яъни жангни бевосита Оқ уй ҳудудида ўтказишни кўзламоқда.
Бу турнир аниқ бўлади, — деди UFC президенти Дана Уайт CBS Morning дастури эфирида.
Унинг сўзларига кўра, мусобақани ўтказиш тартиби АҚШ президенти Дональд Трамп билан муҳокама қилинган. Энди фақат техник тафсилотларни Оқ уй администрацияси билан келишиш қолган. Турнир 2026 йилда Америка Қўшма Штатларининг 250 йиллигига бағишланади.
UFC Оқ уй ҳудудида ўтказиладиган мусобақанинг иштирокчилар рўйхати ҳозирча аниқланмаган. Номзодлар орасида энг кўп тилга олинаётган спортчи — Трампнинг севимли жангчиси Колби Ковингтон. Аммо унинг сўнгги жанглардаги натижалари ва дивизиондаги кучли рақобат бу имкониятни қийинлаштириши мумкин. Шунингдек, ямайкалик Ренди Браун ҳам Ковингтон билан жанг қилиш истагини билдирган.
Маълумотларга кўра, Дональд Трамп нафақат UFCнинг барча йирик турнирларида фахрий меҳмон сифатида қатнашади, балки лига қийин вазиятда бўлган даврда ёрдам берган шахс сифатида Дана Уайт билан яқин дўстона алоқага эга. Трампнинг фикрича, АҚШдаги аралаш яккакураш мухлисларининг катта қисми унинг сайловчилари ҳамдир.
Трампнинг режасига кўра, жанг 2026 йилда, АҚШ Мустақиллик декларацияси имзоланганининг 250 йиллиги муносабати билан ўтказилади. АҚШ президенти тахминан 25 минг томошабин келишини кутмоқда. Бу янгиликка тажрибали юлдузлар ҳам бефарқ қолмади. Жон Жонс ижтимоий тармоқларда Оқ уйда бўладиган турнирда қатнашиши мумкинлигини ишора қилди.
Конор Макгрегор эса шундай ёзди:
АҚШни 4 июль — Мустақиллик куни билан табриклайман! Президент Трампнинг Оқ уйда UFC жанги ўтказиш қарори мени ҳайратда қолдирди. Бу мен учун улкан шараф бўларди! Менга ишонишингиз мумкин!
Оқ уй ҳудудида жанг ўтказиш техник жиҳатдан имкони бор — катта майдонда октагон ўрнатиш мумкин. Асосий савол эса хавфсизликни таъминлаш ва тадбир форматини аниқлашда. Сабаби Трамп ҳозирча фақат битта жанг ҳақида гапирган, тўлиқ турнир ҳақида эмас.
Изоҳ (0)