Ғазо сектори ҳукумати матбуот хизмати хабар қилишича, Америка-Исроил гуманитар ёрдам марказларидан келган ун қопларида оксикодон туридаги гиёҳванд модда бўлган таблеткалар аниқланган.
Ғазо инсонпарварлик ёрдами жамғармаси орқали АҚШ ва Исроил кўмагида ташкил этилган гуманитар ёрдам марказларида тарқатилаётган ун солинган қопларда гиёҳвандлик таъсирига эга таблеткалар топилган.
Маълум қилинишича, “тўрт киши Америка-Исроил гуманитар ёрдам марказларидан келган ун қопларида оксикодон туридаги гиёҳвандлик моддаси бўлган таблеткаларни аниқлаган”.
Баёнотда таъкидланишича, гиёҳванд моддаларни ун солинган қопларга жойлаштириш “фуқаролар соғлиғи ва жамиятнинг ижтимоий тузилишига қарши қаратилган жирканч жиноятдир”.
Ғазо ҳокимияти Исроилни гуманитар ёрдам баҳонасида гиёҳванд моддаларни контрабанда қилиш орқали фаластинликлар орасида гиёҳвандликни ёйишга уринишда айбламоқда. Расмийларнинг фикрича, бундай моддалардан “ифлос урушнинг юмшоқ қуроли” сифатида фойдаланиш ҳарбий жиноят ҳисобланади ва халқаро гуманитар ҳуқуқ нормаларини бузади.
Ҳокимият вакиллари бундай марказлардан озиқ-овқат оладиган аҳолини ҳушёр бўлишга, инсонпарварлик ёрдамини синчковлик билан текширишга ва шубҳали моддалар ҳақида зудлик билан хабар беришга чақирган. Оилаларга фарзандларини ушбу марказларга бориш хавфи ва гиёҳванд моддалар таҳдиди тўғрисида огоҳлантириш тавсия этилган.
Шунингдек, баёнотда халқаро ҳамжамиятни юзлаб одамлар ўлимига сабаб бўлган бундай “ўлим тузоқлари” фаолиятини тўхтатишга чақирилган.
Ғазо ҳукуматининг 25 июндаги маълумотларига кўра, 27 майдан буён ушбу ёрдам тарқатиш марказларида 549 фаластинлик ҳалок бўлган, яна 4066 киши жароҳат олган.
БМТ Инсонпарварлик агентлиги (OCHA) Ғазода касалликлар кўпайиб бораётгани, ўта зарур дори-дармон ва тоза сув йўқлиги сабабли тинч аҳоли ҳалок бўлаётганини таъкидлади.
Изоҳ (0)