Isroil armiyasi va dronlari qamaldagi G‘azo sektorida 86 nafar falastinlikni, jumladan, yordam tarqatish markazlari yaqinida 56 kishini o‘ldirdi. Bu haqda Al Jazeera xabar berdi.
Anklav janubidagi Rafah shahrida 24-iyun kuni 27 nafar falastinlik yordam punktlarida Isroil harbiylari tomonidan otib tashlangan. G‘azoda urush boshlangandan beri halok bo‘lganlar 56 mingdan oshgan, 131 848 kishi yaralangan.
G‘azo shahri janubidagi Salohiddin ko‘chasida sodir bo‘lgan hujumda kamida 25 kishi halok bo‘lgan. Yana 140 dan ortiq kishi jarohatlanib, ulardan 62 nafari og‘ir ahvoldaligi aytilgan.
Jabrlanganlar turli sog‘liqni saqlash muassasalariga, jumladan, al-Shifo kasalxonasiga yetkazildi. Shoshilinch yordam bo‘limi “qonga to‘lib ketdi”. Ko‘pchilik tibbiy yordamni kutib, vafot etdi, dedi Al Jazeera muxbiri.
Guvohlarning aytishicha, odamlar yordam mashinalariga yaqinlashayotganda Isroil harbiylari ularga qarata o‘t ochgan. Otishmalarning aksariyati ogohlantirishsiz sodir bo‘lgan. G‘azo gumanitar jamg‘armasi yordam tarqatishni boshlaganidan beri isroillik askarlar tomonidan 400 dan ortiq falastinlik halok bo‘lib, 1000 kishi yaralangan.
Izoh (0)