БМТ Инсонпарварлик агентлиги (OCHA) Ғазода касалликлар кўпайиб бораётгани, ўта зарур дори-дармон ва тоза сув йўқлиги сабабли тинч аҳоли ҳалок бўлаётганини таъкидлади. Бу ҳақда Al Jazeera хабар берди.
Сўнгги икки ҳафта ичида 19 мингдан ортиқ ўткир диарея ҳолатлари, шунингдек, 200 дан ортиқ ўткир сариқлик синдроми ва қонли диарея ҳолатлари қайд этилган.
“Ушбу эпидемиялар Ғазода тоза сув ва санитария йўқлиги билан бевосита боғлиқ. Соғлиқни сақлаш тизимининг янада барбод бўлишини олдини олиш учун ёқилғи, тиббий буюмлар, сув, санитария-гигиена воситаларига эҳтиёж жуда катта”, дейилади БМТ баёнотида.
Исроилнинг Ғазога ёқилғи киришини блокировка қилиши ҳудуддаги айрим заводларини ва сув тизимини инқирозга дучор қилган. Исроил ҳарбийлари Ғазонинг катта қисмини вайрон қилиб, ҳудуднинг деярли бутун аҳолисини кўчишга мажбур қилган. Оғир гуманитар шароитлардан ташқари, Исроил ҳарбийлари ҳар куни Ғазода ўнлаб фаластинликларни ўлдиришда давом этмоқда. Етакчи ҳуқуқни ҳимоя қилиш гуруҳлари ва БМТ экспертлари Исроилнинг Ғазодаги ҳаракатларини “геноцид” деб атамоқда.
OCHA 26 июнь куни Ғазо марказидаги Дайр-ал-Балаҳга берилган зарбадан сўнг 20 дан ортиқ одам ҳалок бўлгани ва яна 70 га яқин киши жароҳатланганини маълум қилган. Шу куни Исроил ҳужумлари оқибатида Ғазо бўйлаб камида 70 киши ҳалок бўлган.
UNICEF 19 июнь куни Ғазодаги сув тизимларининг антропоген тарзда ишдан чиқиши ҳудудда сунъий қурғоқчиликни келтириб чиқарганини маълум қилган эди.
Изоҳ (0)